Потполковникот на Армијата што учествуваше во европската мисија во Централноафриканската Република и се зарази со коронавирус, рано утрово беше донесен со медицинска евакуација во Скопје. Добро го поднесе летот и сместен е на Инфективната клиника, извести министерката за одбрана Радмила Шекеринска.
После оваа објава на социјалните мрежи се забележани коментари со говор на омраза со препознатлив вулгарен речник и кованици.
Извесен Хари Потер, обвинува дека потполковникот заминал за, како што вели „белосветски туѓи интереси“ и дека не требало да ни го враќаат, пропратено со говор на омраза и навредливи кованици „вие бре бандо северна“.
Извесен Панде Лазаревски, исто така бара да не се враќа дома и да го лечат во НАТО, а не, како што вели „нас да ни го товарат“. Тој потоа продолжува со експлицитен говор на омраза и навреда: „говедава што служат во него се платени убијци“.
Инаку, заразениот македонски потполковник заедно со уште еден војник бил во мисија на Европската Унија за обучувачи во Централноафриканската Република.
„Причината зошто се одлучивме за евакуација е фактот што во Централноафриканската Република, во рамки на мисијата на ЕУ, функционира болница која не може да обезбеди соодветна медицинска помош доколку неговата состојба се влоши и затоа се одлучивме подобро да превенираме отколку потоа да се занимаваме со последиците, изјави вчера министерката Радмила Шекеринска.
Ј. Ѓорѓиоски
