Комисијата за жалби при Советот за етика во медиумите на Македонија (СЕММ), врз основа на примена жалбa од Бранко Героски, донесе одлука, дека се отфрла како неоснована Жалбата на Бранко Героски за сатиричниот текст „Камчев конечно поднел документи за посвојување на Геро“, на РИБАРО, објавен на Фронтлајн, известуваат од СЕММ.
Од СЕММ нагласуваат дека Фронтлајн не ги прекршил етичките и професионални стандарди. Комисијата за жалби утврдила дека жалбата е НЕОСНОВАНА и едногласно одлучиле дека нема прекршување на Кодексот на новинарите на Македонија.
„На седницата на 31 мај 2021 година, Комисијата за жалби ги разгледа наводите на жалителот и изврши увид во спорната содржина. Комисијата, најнапред, утврди дека се работи за текст со сатиричен карактер, во чии рамки е поставена и фотографија во облик на фотомонтажа. Содржината е уредно означена во соодветна рубрика, од која јасно се воочува дека е посветена на хуморот и сатирата. Истото е назначено и под самиот текст, во кое се нагласува дека: „Рубриката АХА! е простор за хумор и сатира. Секоја сличност со реалноста е намерна и не е претерана“, се вели во образложението од одлуката на СЕММ.
Став на членовите на Комисијата е дека, колку и да е зајадлив и провокативен авторот, текстот не ги надминува границите на слобода на изразување, особено кога станува збор за сатирата. Се работи за поджанр на жанрот коментар, во кој авторите преку хиперболизирана реалност можат и имаат право да ги изнесат своите ставови. Острата и полемична сатира до степен на претерување и изнесување извртени содржини, како базични стилски обележја, во основа се етички дозволени, ако притоа не навлегуваат во интимната сфера на личноста и ако авторот не користи навредлив или дискриминирачки јазик. Комисијата се согласи дека во текстот на „Фронтлајн“ нема такви елементи и дека нема прекршување на Кодексот на новинарите. Став на Комисијата е дека хуморот и сатирата, освен во исклучителни случаи, по правило не подлежат на обврската за „втора страна“. Најпосле, предмет на опсервација во текстот е јавна личност, која за разлика од приватните лица, подлежи на посилен јавен надзор и потенцијално пошироки граници на прифатлива критика и, поради тоа, јавните личности треба да покажат поголем степен на толеранција.
Во овој контекст, Комисијата за жалби потсетува дека не може и нема право да ги утврдува фактите наведени во содржината, туку единствено да ги утврдува етичките и професионалните стандарди во новинарскиот производ.
Героски во жалбата вели дека авторот на текстот шири дезинформации со јасна намера да создаде лажна слика во јавноста за имотната состојба на новинарот. Тој потенцира дека никој од редакцијата на „Фронтлајн“ не се јавил да ги провери информациите за неговиот недвижен имот, кои, како што наведува Героски, патем, биле достапни и во Катастарот на Република Северна Македонија. Подносителот на жалбата, меѓу другото, посочува дека во содржината, која била одраз на уредувачката политика на порталот, биле искажани две крупни лаги, со кои експлицитно бил прекршен Кодексот на новинарите.
Адвокатката во својство на полномошник на Фронтлајн, одговори на наводите на жалбата. Таа рече дека интернет – порталот „Фронтлајн.мк“ во целост ја отфрла жалбата на Героски како неоснована. Појаснува дека оспорениот текст е објавен во рамките на рубриката „АХА“, посветена на хуморот, и дека во никој случај целта на содржината не била да го навреди подносителот на жалбата, Бранко Героски. Адвокатката потенцира дека и од самиот наслов и од содржината, како и од рубриката во која бил поставен текстот, било повеќе од очигледно дека станува збор за хумористична содржина.
