Роберт Крстевски е еден од ретките граѓани од Тетово кој велосипедот го користи како превозно, но и како средство за рекреација. Вели возењето велосипед е голем ризик. Нема доволно велосипедски патеки, а тие кои ги има се узурпирани од паркирани автомобили, па дури и на самите патеки има поставено контејнери за фрлање на комунален отпад. Но љубовта кон возењето велосипед е една од причините поради која не се откажува, па често знае и надвор од градот да вози со неговите другари, а Тетово само да им биде како пропратна станица.
„Каде и да одиме, со друштвото мора да поминеме низ Тетово и тогаш е многу опасно, сешто има на велосипедската патека, зборам за таа на булеварот Илинденска која се обележа неодамна. И не само возила и контејнери, некогаш наидуваме и на маси и столици поставени на самaта патека како и палети, продукти и пакети од самите маркети, невидена работа. Мора да се внимава да гледаш постојано лево и десно, не е безбедно, општината и полицијата треба да обрне повеќе внимание на оваа категорија учесници во сообраќајот, да има безбедни патеки, но и повеќе патеки. Тетово како град, како местоположба е одличен за возење велосипед не е територијално голем, но е и рамен“, вели Роберт Крстевски велисипедист од Тетово
Како и велосипедистите така и пешаците не се чуствуваат безбедни, тие се жалат дека им се узурпирани тротоарите.
„За нас пешаците никој не се грижи, ниту полицијата, ниту општината, тие возила што се паркирани на тротоарите треба да се тргнат, не им е тука местото, кога се тука паркирани го узурпираат нашиот простор, па ние мора да се движиме по коловозите што е многу несигурно за нас, особено за постарите лица, но и за децата“, вели еден жител на Тетово.
Небезбедната инфраструктура си носи свои последици.
„За изминативе 5 месеци имаме 27 пешаци кои биле учесници во сообраќајки, од нив двајца за жал настрадале, имаме и сообраќајки со велисипедисти, тука морам да кажам дека треба да се поработи на инфраструктурата, но тоа е надлежност на Општина Тетово, што е до полицијата ние преземаме мерки превентивни, како и репресивни, но тука морам да потенцирам дека превентивата подобро делува“, вели Бобан Симјановски, заменик командир на Полициската станица Тетово за безбедност на патниот сообраќај.
Од денеска Секторот за внатрешни работи Тетово започна со информативни-едукативни средби со граѓани, во рамките на новиот превентивен проект на СВР Тетово „Поголема безбедност на пешаците,мотоциклистите, велосипедистите и возачи на електрични тротинети и запознавање со позначајни прописи и измени на Законот за безбедност на сообраќајот на патиштата“. Носител на проектот е Отсекот за превенција, додека неговото мото е „Само искуството е знаење, сè друго е информација и едукација“.
СВР Тетово дистрибуираше и околу 2000 наменски изработени флаери на македонски и албански јазик.
Зоран Димовски
