Во Скопје моментно се активни 18 пожари од кои три се најкритични, во Кучково кон Горно Свиларе, меѓу Добри Дол и Ракотинци во Сопиште, како и во Горно Блаце. Како што соопштија денеска на прес-конференција директорот на ЦУК Стојанче Ангелов и неговите соработници, за само неполн час се пријавени нови седум пожари. Причина за ваквата алармантна ситуација се високите температури и силниот ветер кој го отежнува гасењето.
Од денеска Главниот штаб за управување со кризи ја презема целосната координација во борбата против пожарите. Главниот штаб на седница попладнево донесе Акциски план за превенција и справување со пожарите. Како што соопшти директорот на ЦУК, Стојанче Ангелов, планот е ист по обем како минатите години кога имаше силни пожари, но засилен.
Ќе бидат ли повлечени од македонскиот пазар сладоледите „сникерс“ и „твикс“ на производителот „Дукатос“, се очекува наскоро да соопшти Агенцијата за храна и ветеринарство (АХВ). Овие два вида сладоледи, како и овошниот јогурт со рибизла на „Дукатос“ веќе не може да се купат во Црна Гора, БиХ и Србија. Повлечени се од маркетите по сомнежот дека во нив има остатоци од пестицидот етилен оксид.
Овој јули беше најтопол во светот, по јули 2019 година и јули 2016 година, соопштија научниците од ЕУ. Според нив, минатиот месец беше обележан со невообичаено високи температури во многу региони – од Финска до САД.
Олимпискиот домаќин Токио потврди над 5.000 новозаразени со коронавирус поради брзото ширење на делта мутацијата, а експертите стравуваат дека здравствениот систем би можел наскоро да доживее колапс. Новозаразените 5.042 лица претставуваате нов рекорд за јапонскиот главен град. Научниците стравуваат дека дневниот број на заразени може двојно да се зголеми во следните две недели. Во болниците се примаат само сериозно заболени.
М. Миткоска
