пишува: ЏАБИР ДЕРАЛА
Се запалија шумите низ целата земја, како и секоја година, насекаде низ светот. Дрилот е познат. Волонтерите во заднинските и пожарникарите во првите линии ги ризикуваат своите животи за да ги изгаснат пожарите. Тука се и стотиците војници и полицајци кои од првиот ден излегоа на фронтот.
ПОЖАРНИКАРИТЕ ВО СВЕТОТ СЕ СЛАВАТ КАКО ХЕРОИ
Во светот, јавноста ги прогласува пожарникарите за херои. Филмаџиите прават документарни и играни филмови за нив.
Владите и институциите преку кризни штабови, ги санираат последиците од пожарите и преземаат мерки за едукација и превенција. Јавноста никогаш не е целосно задоволна, колку и да се успешни институциите, но никогаш не изостануваат ниту позитивните оценки и поддршката за добрите чекори.
Се запалија и македонските шуми. За жал, спомениците и стиропорните фасади не се обучени да тргнат во борба против огнената стихија. Но тоа што сигурно имаме се храбри и пожртвувани пожарникари, какви-такви ретро возила и опрема, но и искрени пријатели од регионот и Европа. Сите поитаа на огнениот фронт и, за среќа, без жртви и успешно ја совладуваат наездата на огнот.
ЗАТРУЕНА ЈАВНОСТ
Македонската затруена ФБ-ориентед јавност се подбива со пожарникарите и со нивната опрема, ги плука владата, општините и институциите, а Мицко-хидро-кафана-теретана и неговите помали лево-десни братчиња и сестрички од македонскиот политички подрум прават сè за да ќарат некој предизборен политички поен врз грбот на оние што се борат со пожарите.
Нема да прави пи-ар, вели, од пожарите, а прв трча да се слика пред камерите, како носи пакети со вода. Виде дека му се удри од глава кога се појави само со едно шише од пола литар, па се качи божем да дели пакети од камион. И ете, уште една илустрација за тоа како се поделени политичките сили во нашата земја.
ПОЛИТИЧКИ ПИРОМАНИ
На една страна се храбрите пожарникари, волонтери и луѓето од институциите. Тие се придружени од армијата и полицијата. Се служат со нашата домашна механизација и опрема, застарена, но функционална. Тие 30-40 години стари ФАП-ови камиони кај некои побудија дури и гордост и носталгија, дека сè се може кога се сака.
И напомош ни дојде цела армија пожарникари со нивната модерна механизација од Австрија, Словенија, Србија, Бугарија и други наши соседи и пријателски земји. Му текна ли некому да се запраша дали нашата земја ќе добиеше ваква регионална и меѓународна помош, да останеше онаква, никаква, заробена, затворена и изолирана како што беше до пред четири години?
На другата страна се политичките пиромани, како што веќе ги нарекува дел од јавноста. На огромната машинерија покрената од државата, заедно со огромната помош од странство ѝ се спротивставија со огнот на омразата, лагите и по некое камионче со пакети вода за сликање.
СО ДЕЗИНФОРМАЦИИ ДО ПОЛИТИЧКИ ЌАР
Видовме како се запалија планините, видовме и како се гасат. Со енергична акција, со пожртвуваност на нашите најголеми херои, пожарникарите, како нашите, така и странските, со нашите војници и полицајци, со волонтерите – извесно е дека ќе однесеме победа над огнот. Тие пожари ќе згаснат, дрвјата ќе пораснат, штетите ќе се надоместат.
Видовме и како се палат политичките пожари. Дел од политичарите, оние што постојано ги гледаме како остануваат покрај шините, ја искористија и оваа неволја што ја снајде нашата земја, па поитаа да ќарат по некој предизборен поен во јавноста.
И наместо да направат нешто навистина корисно во овие тешки мигови, арамиите од политичкиот подрум измислуваат и шират дезинформации. Само во еден ден излегоа со најмалку две дезинформации, онаа со стари слики од Пакистан, божем кај Пехчево, и уште погрдата кампања за украдена моторна пила и водна пумпа од австриските пожарникари. И тоа, се разбира, ѝ се припишува на владата. Што значи дека ниту еден нивни човек не е на терен, на фронтот со огнот.
Разумен човек би рекол, кога веќе се толку мрзеливи и неспособни, тогаш барем да молчеа, да не одмагаат. Но кому да му се каже? Таков пожар, едноставно, не се гаси со вода.
