Во пресрет на локалните избори, во државата е направено теренско истражување на агенцијата „Брима“ за политичките ставови на населението во Република Северна Македонија, спроведено во периодот од 27 август до 9 септември годинава на национално репрезентативен примерок (анкетата е направена според методот лице-в-лице, во домот на испитаникот), со запазаување на сите демографски карактеристики на популација од 18+ години во државата, во која се опфатени 1.201 испитаници. Резултатите се со маргина на грешка од +/- 2,8%, објави ексклузивно „Слободен печат“.
И во оваа анкета најпопуларниот политички лидер во Македонија е Зоран Заев, кој со своите 11,8% од поддршката на анкетираните убедливо води пред лидерот на опозицијата Христијан Мицкоски (7%). Меѓу етничките албански политичари, пак, „трката“ е нешто потесна, иако Ахмети со 5,9% и Биљал Касами со 4,4% го предводат „дуетот“ во власта, пред опозиционерите Зијадин Села (4,1%) и Африм Гаши (0,4%).
За „водечкиот“ Заев „многу благонаклон“ и „донекаде благонаклон“ став искажале 13,6% и 17,8% од испитаниците, додека за „донекаде благонаклон“ и „многу неблагонаклон“ став се определиле 18,7% и 46,9% анкетирани. За споредба, на Христијан Мицкоски „многу благонаклоно“ гледаат 8,3% и „донекаде благонаклоно“ 15,8% од анкетираните, а комбинираниот скор на „многу“ и „донекаде“ неблагонаклонетост надминува 71% од испитаниците. Во случајот на албанските лидери таа дискрепанца е уште поголема.
Кога станува збор за натпартиската функција на претседателот Пендаровски, за него расположението е релативно поврамнотежено: тој одредена благонаклонетост предизвикува кај 40% од анкетираните, наспроти 56,5% неблагонаклонетост. Тоа е многу слично со комбинираниот скор на Венко Филипче, на пример, за кого благонаклон став изразиле речиси 41% од анкетираните, а скорот кај оние кои неблагонаклоно гледаат на него и неговата работа е нешто над 56%.
Извор: Слободен Печат
