Кандидатот за градоначалник на Кавадарци на ВМРО-ДПМНЕ и коалицијата Митко Јанчев денеска информира дека отворање нов граничен премин Мајден-Пуљевац со Република Грција е еден од проектите од неговата изборна програма.
-Со овој проект, општината Кавадарци би имала бенефит од зголемена соработка на стопански и економски план. Тоа исто така би значело заживување на селата во овој крај на Кожуф планина, нагласи на прес-конференција Јанчев.
Тој претстави дел од проектите од новата изборна програма, меѓу кои и проектот за доизградба на колекторот од село Сопот до село Марена, изградба на прочистителна станица во Марена. Тие проекти, посочи, се од суштинско значење за кавадарчани.
Јанчев најави изградба на пат од село Рибарци до Сопот. Како што истакна, со реализација на овој проект, ќе се поврзат двете општини, Кавадарци и Росоман.
-Ќе се добие уште една заобиколница што ќе се користи за товарни возила, појасни Јанчев./MИА/.
