Нема можност за „брзи избори“ во Македонија, бидејќи и „најбрзите“ би биле некаде за време на идната пролет, пишува Орданоски. Владините партнери го потврдија стабилното парламентарно мнозинство и се против оставката на Заев. Обвинет во предметот „Шпански скали“ стана претседател на Советот на Аеродром. Старо-новиот градоначалник на Карпош во петок на суд.
ФРОНТ И РЕНДГЕН
Цунамито помина, следува спасувачката мисија… Нема можност за „брзи избори“ во Македонија, бидејќи и „најбрзите“ би биле некаде за време на идната пролет. Да не прераскажуваме закони и да толкуваме рокови, врти-сучи, без 4-5 месеци избори побрзо не би можеле да се спроведат – освен ако не реши власта итно да ги свикува! Толку будали, после вакви изборни резултати, веројатно не се, пишува Сашо Орданоски.
ПОЛИТИКА, ПРАВДА И СОЦИЈАЛНИ МРЕЖИ
Владините партнери го потврдија стабилното парламентарно мнозинство и се против оставката на Заев. На средбата заеднички е констатирано дека не се потребни предвремени парламентарни избори, бидејќи тие единствено би ја втурнале земјата во политичка, економска, општествена и безбедносна криза, но исто така ќе ги закочат и процесите на европски интеграции.
Петровска на Утрински брифинг: Имаме стабилно мнозинство, потврдија и коалициските партнери. Според Петровска одлуката која што претседателот на СДСМ и премиер Зоран Заев ја соопштил вечерта по соопштувањето на изборните резултати, е негова лична одлука.
Стејт департмент: Ги следиме случувањата во Северна Македонија, соработката со Владата продолжува. Во изјавата се нагласува дека „САД ја сметаат Северна Македонија како доверлив и ценет партнер во регионот, и со нетрпение очекуваат да продолжи соработката со Владата на Северна Македонија во областите од заеднички интерес додека го продолжува напредокот што го постигна кон евроатлантската интеграција“.
Богоевски: Или некој во коалицијата не разбрал нешто, или „патриотизмот” и принципите им важат само за ПР. Фалевте, будалчиња. Фејсбук објава од Павле Богоевски.
Каракачанов: Не можеме а да не бидеме загрижени за победата на ВМРО-ДПМНЕ на локалните избори. Тоа се оние кои зборуваа за потребата од раскинување на договорот, за обновувањето на натписите на спомениците кои ја карактеризираат нашата земја како фашистички окупатор и кои повикаа на општа дипломатска офанзива на ЕУ против Бугарија, изјави Каракачанов.
Старо-новиот градоначалник Јакимовски, в петок на суд за незаконие во Карпош. Во 2019 година, бил обвинет од Обвинителството за гонење организиран криминал и корупција заедно со други лица, за злоупотреби при јавни набавки за Општина Карпош, незаконска легализација на привремени објекти и за приватизација на градежно земјиште што е во сопственост на државата. Откако е покренато обвинението, петмина се спогодиле, еден признал вина, а судењето за Јакимовски и за другите обвинети e во тек.
Обвинет во предметот „Шпански скали“ стана претседател на Советот на Аеродром. Заедно со Миле Јанакиески и уште 9 други лица се товарат дека со незаконската продажба на парцелите пред зградата на ЕВН на плоштадот во Скопје, ја оштетиле државата за 2,6 милиони евра.
Локалните избори оценети како фер и демократски, родова нееднаквост и меѓу новите градоначалници. Додека од кандидатите во вториот круг се бараа финансиски извештаи тие не беа објавени пред гласањето. Од оваа причина, како и поради недоволните информации објавени во јавноста за отчетноста во врска со финансирањето во кампањата во првиот круг се намали транспарентноста, забележуваат од Мисијата на ОДИХР.
Благ пад на бројот на новозаразени од Ковид-19, трета доза вакцина примиле над 30.000 граѓани. Заклучно со 31 октомври вкупно се вакцинирани 805.008 граѓани, а ревакцинирани се 775.825.
И. Т. З.
