„Во Извештајот е констатирано дека раководното лице презело активности спротивни на член 34, став 1, алинеа 3, од Законот за спречување на корупција и судир на интереси, член 8-а став 1 алиниеа 3 од Изборниот законик и член 11 од Законот за заштита од вознемирување на работно место. Со тоа се потврдува дека раководното лице водело и ја завршило дисциплинската постапка врз вработени во време на изборен процес“, се вели во одговорот за МКД.мк од Министерството за култура.
Фронтлајн вчера доби одговор од Министерството за култура кое потврди дека имало претставка за вд. директорката на НУ Театар Комедија, Нора Шакири Марковиќ за вршење мобинг кон вработен во институцијата.
Редакцијата на Фронтлајн испрати прашање до Театар Комедија кое гласеше.
„Наши извори од инспекциските органи ја известија Редакцијата дека во Театар Комедија има вонредна инспекција. Изворите ја информираат Редакцијата за пријави за мобинг. Ве молиме за изјава во врска со овие информации“, но оттаму не добивме одговор.
Како што претходно објави Фронтлајн, дознавајќи од свои извори, минатата недела во театарот влегла вонредна инспекциска контрола по пријава, поради мобинг и вонемирување на вработени од страна на Шаќири.
Фронтлајн доби долг одговор и од Државниот инспекторат за труд во кој се вели:
„Со цел проверување на наводите во претставката, државен инспектор за труд на ден 16.11.2021 година изврши вонреден инспекциски надзор кај субјектот на надзор Национална установа Театар Комедија – Скопје и на записник констатираше наоди за утврдена фактичка состојба. Имено, при надзорот се констатираше дека В.Д Директорката на НУ Театар Комедија – Скопје против две лица вработени во институцијата водела дисциплинска постапка во време на изборен процес.
При извршениот вонреден инспекциски надзор од страна на инспекторот за труд е констатирано дека дисциплинските постапки против работниците се конечни, при што инспекторот за труд не може да изрече инспекциска мерка, а врз основа на член 22 и 23 од Законот за спречување на
корупција и судирот на интереси ( Сл.весник на РСМ бр.12/2019), предметот е препратен до Државната комисија за спречување на корупција, на натамошно постапување со цел да утврди дали дисциплинските постапки започнати и завршени во време на изборен процес се спроведени согласно закон.
Исто така при извршениот надзор се констатираше дека работодавачот, дел од вработените ги има запознато со мерките и постапката во врска со заштита од вознемирување на работно место и со правата, обврските и одговорностите на работодавачот и работникот при самото вработување и во текот на работењето, а дел од вработените ги нема запознаено, што е спротивно на член 11 од од Законот за заштита од вознемирување на работното место.
За оваа констатирана неправилност во работењето, инспекторот за труд донесе решение – опомена по член 258 од Законот за работните односи, со кое се опоменуваодговорното лице кај работодавачот НУ Театар Комедија – Скопје, да ги отстрани неправилностите и недостатоците утврдени во записникот ИП1 бр.0907-1259 од 16.11.2021 година, така што оној дел од вработените кои не се запознаени со мерките и постапката во врска со заштита од вознемирување на работно место и со правата, обврските и одговорностите на работодавачот и работникот при самото вработување и во текот на работењето, истите да бидат запознаени согласно член 11 од Законот за заштита од вознемирување на работно место.
За новa в.д. директорка на НУ „Театар комедија“ е назначена актерката Магдалена Ризова Черних која и е вработена во театарот, информираат од Министерството за култура.
