Советот за етика во медиумите (СЕММ), во соработка со Првата детска амбасада Меѓаши, минатата недела објави Препораки за етичко известување за деца и млади, имајќи ја предвид ситуацијата со социјалните мрежи и интернет порталите.
Во изјава за Фронтлајн, Катарина Синадиновска од СЕММ, во врска со видеото со младиот Петар, кое деновиве е актуелно на социјаните мрежи, нагласува дека дозвола за снимање не е исто што и дозвола за споделување.
Дозвола за снимање не е исто што и дозвола за споделување. Едно е да има дозвола за снимање друго е да се споделува сиров материјал, необработен медиумски, вели Синадиновска.
Од донесените препораки во објава на Фејсбук, за овој случај Синадиновска ја издвојува Препораката 9:
„Не смее да се користат фотографии, изјави и видео – записи од деца без согласност од родител/старател/институција – старател. ЕДНОВРЕМЕНО, медиумот има право да не ја објави содржината дури и кога има добиено дозвола, доколку процени дека ќе го изложи малолетникот на каков било ризик.
Тоа што не сте свесни дека нешто е проблем, не значи дека проблемот не постои, значи само дека не сте свесни. Уште многу имаме за учење на темава“, напиша Синадиновска.
Потенцира дека медиумите носат одлука да не објават некоја содржина дури и кога имаат дозвола, ако проценат ризик од објавувањето.
„Родителите/старателите понекогаш не се свесни за моќта што медиумите ја имаат и за опасностите што таа моќ ги носи со себе. Токму затоа, медиумите мора да се одговорни и да предупредат на можни последици. Исто така, земајќи ги сите околности предвид, медиумите носат одлука да не објават некоја содржина дури и кога имаат дозвола, ако проценат ризик од објавувањето (вклучително и ризик од сајбер булинг). Таман и да има молба да се објави, не само дозвола! Да не зборувам за случаи кога воопшто таква дозвола нема“, вели Синадиновска.
Препораките за етичко известување за деца и млади се изработени во рамки на проектот „ЕУ поддршка за подобрување на медиумската етика”, финансиран од Делегацијата на Европската Унија.
Ј. Ѓорѓиоски
