На местото на кое што градоначалникот на Општина Аеродром, Тимчо Муцунски, предвидува парковско зеленило, тоа веќе постои. Екипата на Фронтлајн излезе на лице место и ги потврди индициите за постоењето на парковското зеленило и игралиштето помеѓу маркетот Зур и Перла Бјанка во Аеродром, Скопје.
Постоечкото парковско зеленило и игралиштето помеѓу маркетот Зур и Перла Бјанка во Аеродром. Фото: Фронтлајн
Милутин Ристески кој прв реагираше преку социјалните мрежи, во изјава за Фронтлајн, истакнува дека паркот е подигнат пред отприлика две години од страна на претходниот градоначалник Златко Марин и дека се работи за евтина пропаганда на Муцунски.
„Всушност се работи за евтина пропаганда. Јас тоа не би го нарекол пи-ар. Како што гледате позади мене се наоѓа парк којшто е подигнат пред отприлика две години од страна на градоначалникот Златко Марин. На ова место до пред само две години имаше депонија, граѓаните на околните згради знаат дека овдека имаше депонија којашто беше исчистена и сега е парк. Евтината пропганда на Муцунски се состои во тоашто пред само два дена ја извести јавноста дека со одлука на Советот се избришани две градежни маркици и на ова место е предвидено парковско зеленило, вели Ристески.
Тој истакнува дека се работи за еден нечесен однос на градоначалникот Муцунски кон своите гласачи и генерално кон граѓаните на општина Аеродром.
„Овдека нема потреба да се предвидува парковско зеленило, парк веќе постои. Како што гледате има љуљашки, има урбана опрема којашто е поставена и така натаму. Така да се работи за еден нечесен однос на градоначалникот кон своите гласачи и генерално кон граѓаните на општина Аеродром. Одлуката којашто ја донесе Советот всушност не е одлука за бришење на маркица. Советот усвои заклучок за усвојување на информација за пренамена на две градежни парцели којашто ќе се случи по усвојување на ДУП-от И13, којшто е ДУП за оваа градска четврт. Всушност тогаш ќе се укинат овие две градежни парцели. Објаснувањето на владејачкото мнозинство беше дека овие две парцели се укинуваат со цел никогаш повеќе да не може тука да се гради. И тоа не е точно. На истиот начин како што се бришат парцелите може на некој во иднина да му текне да ги впише. Така да, сè она што имавме прилика да го видиме на Фејсбук профилот односно на фејсбук страната на градоначалникот е всушност една евтина пропаганда којашто кажува дека ќе се подига парк на местото каде што парк веќе постои и тоа добри две години“, изјави за Фронтлајн, Ристески.
Градоначалникот Муцунски, на Фејсбук напиша дека е донесена одлука за укинување на две градежни маркици и наместо колективни згради ќе се предвиди парковско зеленило.
“…Исто така на денешната седница советот донесе одлука за укинување на две градежни маркици на потегот помеѓу Перла Бјанка и Маркет ЗУР и наместо колективни згради ќе се предвиди парковско зеленило. Со овие одлуки Општина Аеродром јасно става на знаење дека потребите и мислењето на граѓаните се и наш приоритет и дека со нас како локална власт имаат партнер во решавање на сите проблеми”, напиша Муцунски.
Граѓаните кои ги затекна екипата на Фронтлајн на местото каде Муцунски најави дека се планира парк, изјавија дека паркот и детското игралиште постојат и ги користат подолго од една година.
Фронтлајн се обрати до градоначалникот Муцунски со прашање дали може да го објасни ова.
„Дали знаевте дека веќе има зеленило на таа локација?“ – гласи прашањето до градоначалникот.
Иако во општината телефонски нѐ известија дека подготвуваат одговор, сепак, до објавување на овој текст, нема никакво објаснување. Редакцијата ќе остане отворена за дополнителни информации од кабинетот на градоначалникот.
Мартина Ацковска
