Неколку медиуми објавија дека охридскиот градоначалник од редовите на ВМРО-ДПМНЕ Кирил Пецаков, наместо да се изолира по направен тест за Ковид – 19 се појавил на одбележувањето на Водици, се гушкал со граѓани, се ракувал со гостите, а по прославата добил позитивен тест.
Од Државниот санитарен и здравствен инспекторат за А1он, потврдиле дека градоначалникот Пецаков добил решение за изолација по позитивен тест на коронавирус, а потсетиле и дека сè уште важат правилата – секој што се тестира веднаш да се изолира.
Пецаков вели дека не се изолирал по тестирањето за Ковид – 19 и на Водици излегол да ја следи манифестацијата оти побарал тест заради патување, не поради тоа што се чувствува лошо. Тој потврдил дека добил позитивен тест, но следниот ден го повторил тестот и добил негативен резултат.
На својот Фејсбук профил, Пецаков го објави сертификат на кој се гледа дека резултатот од тестирањето направено на 21 јануари е негативен, но претходно Пецаков никаде нема објавено дека првиот ПЦР тест што го направил покажал дека е позитивен.
Тој за Водици бил во контакт со многу луѓе, меѓу другите и со претседателот на ВМРО-ДПМНЕ Христијан Мицкоски.
Како што може да се забележи на фотографијата објавена на фејсбук профилот на Христијан Мицкоски, градоначалникот на Охрид, Пецаков и лидерот на ВМРО-ДПМНЕ Мицкоски, палат свеќи во црква еден до друг во затворена просторија без заштитни маски на лицето.
Мицкоски, пак како што може да се види од неговите објави на Фејсбук, истиот ден бил и во Струга каде се фрлал крстот во Дрим, опкружен со илјадници граѓани.
Во меѓувреме, охриѓани и други граѓани кои за Водици биле во Охрид, се во паника и се вчудоневидени како можел градоначалникот на Охрид, кој патем е доктор стоматолог, да е толку неодговорен, да се тестира а резултатите да не ги чека во самоизолација.
Д. Е.
