РИБАРО
Бараме одговори и одговорност од власта зошто снема струја во моментите кога Мицкоски даваше отчет за сработеното во општините. Бараме одговорност, затоа што никој не смее да ја замолчува демократија, напишаа ВМРО-ДПМНЕ во соопштението со кое реагираат на вчерашното получасовно снемување на струја во Скопје поради пожар на трафостаница и испад на далекувод.
„Да, да, само мислете си вие дека тое е дефект и ненамерно. Комуњарската трафостаница не можела да го издржи сознанието дека вмровските градоначлници се севселенски успешни во нивната работа, и од немај-каде решила да се самозапали, за да не може народот да го проследи отчетот што го организиравме. Ете тоа е вистината!“, вели Мицкоски за АХА.
Дека снемување на струја за време на презентацијата на вмровските градоначалници е режирано од комуњарите кои во случлајов си ја жртвуваа и својата трафостаница, Мицкоски потсетува на неколку моменти од минатото.
„На јавноста добро и се познати таквите нивни методи на дејствување. Сетете се само на намерното исклучување на лифтови за време на изборниот ден во Центар, за да се спречат да гласаат возрасните. И праќањето на технички преглед на автобуси со партиски активисти не смееме да го заборавиме. На режираната сообраќајна незгода, за да не стигнат да гласаат луѓе од дијаспората, се сеќавате ли? Сега ова самозапалување на комуњарската трафостаница за време на нашиот отчет, е континуитет во спречување на демократијата, интриги со кои се обидуваат да нè замолчат и заплашат, но нема да успеат“. вели Мицкоски.
– Но господине Мицкоски, тоа со лифтовите, техничките прегледи, сообраќајките, нели беше на вашите: Миле, Горде, Јанушев, Николовски?!, реплицираше, репортерката на АХА.
– Така де, тоа е континуитетот за кој ви говорев? Нели гледате колку сум вознемирен, врати Мицкоски.
Редакцијата на АХА длабоко сочувствува со Мицкоски и ВМРО-ДПМНЕ, зашто се гледа дека му е нанесен душевен немир од страна на самоубиствената трафостаница во Пинтија и едновремено, го поддржува во неговите демократски борби да ги осуети комуњарите во нивните подли намери.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
