Шведска е наш докажан пријател, која ги поддржува нашите аспирации за членство во Европската Унија, истакна претседателот на собраниската Комисија за европски прашања, Арбер Адеми, во обраќање во рамки на дводневната посета на нашето Собрание од делегација на шведскиот Риксдаг, предводена од Лота Јонсон Форнарве, втор потпретседател на Шведскиот парламент.
Како што информира Комисијата за европски прашања, Адеми истакна дека нашата цел е Комисијата и Собранието на Република Северна Македонија да бидат подготвени за почеток на пристапните преговори со Европската Унија, при што изрази надеж дека за време на актуелното француско претседателство со ЕУ ќе се одржи и Првата меѓувладина конференција и дека ќе почнеме со преговори по Првиот кластер, кој се однесува на владеењето на правото.
-Адеми посочи дека земјата заслужува да ги започне преговорите по поглавјата, што поскоро, и дека очекува шведската поддршка да продолжи и за време на претседавањето со Советот на ЕУ на Шведска, која како дел од триото со Франција и Чешката Република, ќе почне да претседава во јануари следната година. Адеми посебно се заблагодари во име на Комисијата за европски прашања, за поддршката за зајакнување на админстративни и технички капацитети на Комисијата преку заедничкиот проект на Канцеларијата на Обединетите нации за проектни услуги (УНОПС) „Компонентата за зајакнување на капацитетот на Парламентарната комисија за европски прашања“, на Шведската агенција за соработка и развој – СИДА, и на Владата на Норвешка, информира Комисијата за европски прашања.
Извор: МИА
