Дефинитивно постои информациска војна, која не е ново, постоеше и порано. Но, она што се разликува е тоа што Западот излезе од таа вкочанетост кон руската пропаганда. Мислам дека Западот сега ја добива таа војна не само со руската пропаганда, туку и со војната против демократијата, вели Марјан Забрчанец, Национален координатор за Отворен Балкан и за регионални иницијативи во Утрински брифинг.
Анализите покажуваат дека Русија и на тој информативно-пропаганден фронт не се подготвила сосема добро. Воените аналитичари, пак, велат дека Русија сѐ уште нема преземено хакерски напади оти се свесни дека тоа може да предизвика контраудар и да ги урне нивните платформи.
-Се согласувам дека тоа е причината. Хакерството не го измислиле Русите. За првпат западниот блок демонстрира јасна повторувачка порака, се сосредочи и демонстрирше прецизна информација. Демократијата секако е посилна од антидемократијата но досега беше дисперзирана. Руската инвазија ја обедини демократијата. Сега сите велат поддршка за суверенитетот, осуда на војната и апел за мир. Од друга страна пропагандата од Русија е сосема конфузна. Има обвинувања дека Украина има хемиско оружје, а да имаше ќе го употребеше, вели Забрчанец.
Забрчанец вели дека е Македонија е дел од западниот комуникациски систем и се координира со западните комуникациски пораки. Тој додава дека се следат на интернет различни платформи кои шират руска пропаганда и велат дека Русија ѝ се заканува на Македонија со некои смешни наслови.
-Се поставуваат слики од лидерот на Левица со Путин со наслов „Конечно некој нормален“. Ако тоа е нормално, тогаш мнозинството излегува дека е ненормално, вели Забрчанец.
Забрчанец вели дека не се сомнева дека на среден рок ќе се изгуби битката против пропагандата, оти позициите се јасни. Македонски Телеком дури пред два дена ја тргна руската пропагандна телевизија РТ (Раша тудеј), каде сопственик е и владата.
-Резултатот е дека Северна Македонија успеа да ја исклучи РТ. Не мислам дека ваквите примери ќе доживеат замор. Мислам дека руската пропаганда ќе се замори. Македонците доминантно се за НАТО, ЕУ и демократија. Македонскиот народ има чувства кон Русија, но е против војна, вели Забрчанец.
Во врска со страниците на интернет кои вршат проруска пропаганда и кои сигурно тоа не го прават бесплатно, Забрчанец вели дека Владата има јасна стратегија за сузбивање на дезинформациите и за воведување медиумска писменост. Во делот на кривичното право, правилата се јасни – ако имате закана, тогаш настапува Обвинителството, вели Забрчанец.
-Пропагандата за создавање паника дека ќе нема бензин или храна исто така не успеа. Траеше паниката ден или два и толку. Има обиди за напади на комуникациските системи во земјава, тоа во виртуелниот свет е секојдневие, но одбраната функционира, вели Забрчанец.
Ние не го гледаме НАТО како нешто туѓо, ние сме дел од него. Сме се подготвувале за тој систем и во делот на комуникацијата сме пофалени, вели Забрчанец.
-Ако сакаме да ја претставиме на мапа би изгледала слично како и воената стратегија, дефинитивно постои информациска и комуникациска војна. Таа не е нова, таа постоеше и претходно, денес се отсликува на терен со воени дејствија. Она што денес е поразлично можеби од претходно е што западот или НАТО или демократскиот блок конечно излезе од онаа вкочанетост или уплашеност од руската пропаганда и според мене од сите наоди од се она што го гледаме и како доминантен наратив и како веќе востановена перцепција мислам дека западот ја добива информациската или комуникациската војна со недемократската пропаганда.
Според Забрчанец, не станува збор само за руска пропаганда или руски дезинформации или руски лажни вести бидејќи тоа не се само руски дезинформации или руски хибридни напади, станува збор за обид за нарушување или напад на демократијата глобално, во светот.
Сме биле сведоци и кај нас дека не не одминуваат тие хибридни напади и денес а и претходно, вели тој.