Пишува: ЏАБИР ДЕРАЛА
Еден месец брутална руска агресија врз Украина. Требаше да биде блицкриг, се претвори во крвава пресметка на еден болен режим против цивилното население на земја во која агресорите имаат 11 (од вкупно 45) милиони роднини.
Завршува еден месец од крвопролевање во кое не се лее само украинска крв. Украинките и Украинците се борат да го одбранат својот дом, но и целиот свет. Крвари целиот свет и со брзи чекори ита кон својот суров крај.
Тенкови против живо човечко месо. Против деца, трудници, стари жени и мажи. Со ужасниот терор на гранатите, бомбите и ракетите, придружен со теророт на лагите се срамнуваат со земјата цели градови.
Десет милиони цивили, повеќето жени, деца и стари, ги напуштија своите домови, од нив повеќе од три милиони се надвор од границите на Украина. Речиси половина од бегалците се деца. Конвоите на неизмерното човечко страдање на границите и железничките станици ги пречекаа хуманите луѓе од Полска и од другите европски држави. Ги пречека и мрачното подземје. А трагедијата не завршува со бегството од војната. Криминалците го собираат својот данок во крв и дел од жртвите ги голта подземјето.
Еден месец по почетокот на оваа брутална агресија на режимот на Путин, падна во вода сето пропагандно ѓубре. Тој, заедно со своите сојузници – лагите и теророт – тргна во „специјална операција за демилитаризација и денацификација“ против држава што ја води Евреин чие семејство дало жртви во Холокаустот. Му се спротивстави слабо вооружен народ, обични цивили што го бранат прагот на својот дом. Толку.
Војната заврши за Путин. Тој и неговите следбеници ги надвисна сенката на нивните воени злосторства. Историјата ќе ги запомни на своите страници на мракот и злосторствата. Уништени животи, уништени градови, уништени генерации. Што и да се случи во и со Украина, Русија и светот – тој доживеа пораз. Но…
Губитници се сите луѓе на светот, потонати во илузиите на конформизмот, предводени од колебливи политичари и алчни опортунисти. И на сите пропуштени прилики да им се пружи утеха и засолниште на милиони други луѓе во непосредното и подалечното минато.
И целиот свет да го уништи, тоа е пораз за Путин. Тој го нападна човештвото, почнувајќи од Украина и Русија, завршувајќи со целиот свет. Ако го уништи човештвото, не значи дека е победник. Русија мора да му пресуди на овој злокобен лик час поскоро. Или да му се придружи во вечниот мрак на историјата.
