Град Скопје повторно не подржува манифестација која има долгогодишна традиција на одржување. Овој пат тоа е единствениот фестивал за феминизам и феминистичка култура во Северна Македонија, „Прво па женско“.
„Крајно сме разочарани од одлуката на Град Скопје да не ја поддржи овогодинешната музичка програма на единствениот фестивал за феминизам и феминистичка култура во Северна Македонија, „Прво па женско“, наведуваат „Tiiiit.inc“ во објавата на Фејсбук.
Оттаму истакнуваат дека оваа година ППЖ го слави своето јубилејно десетто издание, па затоа, како што нагласуваат, се потрудиле и програмата на фестивалот да ја отсликува оваа децениска заложба за отворање и одржување на овој феминистички простор во нашиот град.
„За жал, добивме само штуро известување по мејл за ваквата одлука, без никакво подетално образложение или решение, кое би ни овозможило да ја обжалиме ваквата одлука на Град Скопје. Затоа се одлучивме вака јавно да побараме објаснување од надлежните и соодветно да реагираме на тоа. Се надеваме дека Одделението за култура при Град Скопје ќе се одважи и ќе ни одговори на овој јавен приговор, затоа што во моментот организацијата Тиииит! Инк. е лишена од секаков друг вид на простор за приговор и објаснување.“, наведуваат од „Прво па женско“
Пејачката и хуманитарка Кристина Арнаудова, пред скоро време објави дека бесплатениот летен камп за деца во социјален ризик, Шарено лето, кој постои од 2017 година, и каде стотици деца го доживеаа својот прв летен одмор, оваа година за прв пат не е поддржан од Град Скопје. Неговото оддржување за првпат е неизвесно, напиша Арнаудова.
Таа во изјава за Фронтлајн истакна дека стотици деца го доживеале својот прв летен одмор преку кампот „„Шарено лето“. Арнаудова рече дека не осудува никој за ваквата одлука, но сепак, за конретниот случај, вели дека донел одлични резултати кај дечиња во социјален ризик кај дечиња – жртви на булинг.
„Видете, тие имаат секакво право да не одобрат проект. И не ги осудувам заради тоа. Како здружение сме биле одбиени многу пати од разни конкурси. Но во конкретниов случај се работи за докажан и уникатен проект кој носи многу добри резултати кај децата во социјален ризик и кај децата жртви на булинг (тоа се децата кои учествуваат на кампот) од аспект на социјализација на тие деца, рушење на предрасуди кои ги имаат, прифаќање од општеството каде често се отфрлени…“, вели Арнаудова за Фронтлајн.
Според Арнаудова, одлуката е чудна и дискутабилна, зошто токму овој проект донел многу радост и задоволство кај многу дечиња.
Ј. Ѓ.