Политикологот проф. д-р. Ана Чупеска во изјава за ФРОНТЛАЈН во врска со штрајкот на СОНК и понудените решенија од Владата, истакнува дека Владата направила сериозен напор и успеала да понуди решение.
„Мислам дека владата направи сериозен напор да во време на криза индуцирана од глобалните случувања, успеа да понуди решение. Тоа треба да се признае, и да се уважи. Воедно, за мене загрижвачка е состбата со децата, кои веќе трета година се вон редовен образовен процес. Тоа ќе има далекусежни последици. Не е во ред да се ставаат во залог дечињата, дополнително, што јавна тајна е дека некои од наставниците им сугерираат на родителите воопшто да не ги носат на училиште децата. Тоа е непримерно да се случува“, вели проф. д-р Ана Чупеска, за штрајкот на СОНК.
Чупеска нагласува дека овој пат интересите на децата не се земаат во предвид.
„Уште повеќе што, кога се носат јавните одлуки, вклучуваќи ги и овие, секогаш приоритет им се дава на интересите на децата. Тоа е основен критериум. Жалам, што добивам впечаток дека овој пат интересите на децата не се земаат во предвид, напротив“, вели Чупеска.
Наставничка и професор кои сакаа да останат анонимни, во изјави за Фронтлајн велат дека во образованието се игра политичка игра и дека треба да се прифати предлогот на Владата за зголемувањето на платите.
„Како вработена во образованието години наназад, мислам дека се играт политички игри на наш грб и на гроб на учениците. После две години сериозни пречки за организиране на нормална настава заради пандемијата, сметам дека со ова правиме дополнителна штета на учениците, држејќи ги повторно надвор од клупите. Во овие моменти на криза зголемувањето на платите од 10% сметам дека е реално и истото треба да биде прифатено од страна на синдикатот“, истакнува наставничката од Кавадарци.
Професор од Кавадарци вели, дека одредени колеги, интересот на партијата го ставаат пред интересот на децата. Прво имал дилеми, но сега е сосема јасно дека штрајкот на СОНК е политички мотивиран, вели професорот.
„Ако до вчера имавме одредени дилеми во однос на штрајкот, дали е политички мотивиран или не, денес е сосем јасно. Ако целта на штрајкот беше повисока плата, истата еве ја добивме. Во криза глобална прифати Владата зголемување на платата од 10%. Ние како професори имаме одговорност и обврска спрема учениците, да им овозможиме нормален образовен процес. Наместо тоа одредени колеги, интересот на партијата го ставаат пред интересот на децата“, рече професорот.
Тој во изјавата за Фронтлајн, потенцира дека штрајкот треба да заврши, да се прифати зголемувањето на платата и образовниот процес да продолжи и понатаму нормално да се одвива.
Ј. Ѓорѓиоски
