Основниот Кривичен суд – Скопје, и судијата Илија Трпков кој го водеше предметот, ги објави пресудите за случајот „Плацеви на Водно“.
Прво обвинетиот – бегалецот од правдата Никола Груевски, обвинет во овој случај за перење пари и противправно стекнување и прикривање на имот, доби казна затвор од 7 години, парична казна во 3.500 евра. Дополнително на Груевски ќе му се конфискуваат недвижен имот, парцели и станови.
Сашо Мијалков, првиот братучед на Груевски и поранешен директор на УБК, е казнет со една година и три месеци затвор.
Судот на обвинетиот Јордан Камчев му одреди казна затвор од 1 година.
Обвинетиот Ристо Новачевски, кум на поранешниот премиер во бегство Груевски, доби условна казна од 2 години затвор, исто и Ненад Јосифовиќ осуден е условно 2 години.
Претходно, во завршните зборови, обвинителката Лиле Стефанова побара Судот на Никола Груевски да му изрече највисока казна, а за обвинетиот Сашо Мијалков казната да биде повисока од предвидената. Воедно, обвинителката побара конфискација на становите на Никола Груевски, вклучително и трите стана во Панорама, сопственост на фирмата „СС инвестмент”.
За останатите обвинети, застапникот на обвинението го процени како исклучително важен исказот на обвинетиот Ристо Новачевски и му предложи на судот истиот да биде условно казнет. Додека, за обвинетите Ненад Јосифовиќ и Јордан Камчев, обвинителката Стефанова побара минимални казни.
Во завршните зборови обвинителката Стефанова наведе дека го повлекува обвинението за Ратка Камчева.
Ј. Ѓ.
