Вицепремиерот задолжен за европски прашања Бојан Маричиќ, денеска престојуваше во посета на Крушево, каде оствари средба со крушевскиот градоначалник Томе Христоски и со заменик градоначалникот на албанскиот град Елбасан, Артур Куни, чии општини се корисници на Програмата „Прекугранична соработка Република Северна Македонија – Република Албанија, Инструмент за пред пристапна поддршка (ИПА 2), 2018 – 2020, jaвува МИА.
– Соработката помеѓу општините Крушево и Елбасан е одличен пример за успешна прекугранична соработка преку реализирани ЕУ проекти кои даваат европска вредноста на регионот. Крушево е важна точка на нашата туристичка карта во која мора да продолжиме да вложуваме и да го искористиме потенцијалот кој го поседува за развој на туризмот, рече Маричиќ на состанокот.
Како што соопшти Секретаријатот за европски прашања, на средбата беа разменети искуства во реализацијата на ИПА проектите и вредноста која тие ја имаат за развојот на општините, особено во полето на туризмот и беше посочено дека двете општини ќе продолжат да соработуваат и во други области, иако туризмот останува нивна примарна цел, искористувајќи ги рационално развојните фондови на ЕУ кои ни се достапни.
Во продолжение на посетата, вицепремиерот Маричиќ учествуваше и на работилница организирана во рамки на проектот на која македонски и албански туристички и маркетинг експерти подготвуваат „Стратешки документ за промоција на Крушево и Елбасан како единствена туристичка дестинација“.
Во рамки на проектот „Крушево и Елбасан – признаена прекугранична туристичка дестинација“, Општина Крушево ќе добие објект на полетувалиштето на Мечкин Камен, за потребите на организација на меѓународни и Светски првенства во параглајдинг.
Вицепремиерот Маричиќ заедно со градоначалниците ја посети оваа локација, каде дополнително ќе се постават две мерни станици, ќе се изградат две „даунхил“ патеки за планински велосипедизам и ќе се постави ЛЕД осветлување околу објектите од културата.
– Целосниот проект вреден 700 000 евра, европски средства, ќе ја збогати туристичката понуда на Крушево и ќе го направи европскиот пат појасен за граѓаните преку зајакнување на видливоста на ИПА фондовите, изјави вицепремиерот Маричиќ, кој е национален ИПА координатор.
Тој повика на целосно искористување на ИПА средствата и уште поинтензивно работење во реализација на ИПА проектите, што покажува дека Република Северна Македонија решително и забрзано чекори на европскиот пат.
