Во црквата „Успение на Пресвета Богородица – Каменско“ денеска се одржува 7. меѓународна поетска манифестација „Охридски поетски бисер“, во организација на истоименото Здружение за литература и култура, а со поддршка на Општина Охрид.
Учествуваат 60-тина поети од земјава и странство, а целта е меѓународна промоција на поетската реч, македонскиот јазик и македонската литература, но и на градот и државата.
Советничката во Советот на Општина Охрид, Билјана Тодева – Силјановска на отворањето на манифестацијата забележа дека поезијата е мост меѓу луѓето и космосот.
– Поезијата постојано се менува и моделира, ја пееле, бардови, шамани и брамани и таа секогаш ја отсликува слободата на изразувањето и преобразувањето и токму затоа поетските супстрати лесно ги насетуваме и во другите книжевни и уметнички облици. Поезијата е таа која не носи во други Светови, ни помага да „нурнеме“ во своите соништа да ги оствариме замислените желби. Таа веројатно е подолгорочна од времето затоа што постоела во минатото, сегашноста и иднината, рече Тодева – Силјановска.
Поетските гласови, истакна, чекаат да оддекнат во нашите интимни простори, а поетските слики – да бидат изложени во нашите внатрешни галерии.
Меѓународната поетска манифестација „Охридски поетски бисер“ е дел од културните настани во програмата за активностите на Општина Охрид во областа на културата за 2022 година/МИА/
