Претседателот на Украина Володимир Зеленски верува дека Народна Република Кина има доволно влијание врз Руската Федерација за да помогне да се запре војната во Украина.
Украинскиот претседател го изјави ова во интервју за Саут Чајна морнинг пост, пренесува Укринформ.
„Кина е многу моќна држава. Тоа е моќна економија… Така што може политички, економски да влијае на Русија. А Кина е [исто така] постојана членка на Советот за безбедност на ОН“, рече Зеленски.
Украинскиот претседател истакна дека од почетокот на руската агресија, немал никаков разговор со лидерот на Народна Република Кина, Кси Џинпинг, иако таква иницијатива имало од украинска страна.
„Би сакал директно да разговараме. Имав еден разговор со [претседателот] Кси Џинпинг пред една година“, рече тој. „Од почетокот на големата агресија на 24 февруари, официјално побаравме разговор, но (немавме) никаков разговор со Кина, иако верувам дека тоа ќе биде корисно“, рече Зеленски.
Во исто време, тој истакна дека разбира дека Кина сака да одржи „урамнотежен“ став кон војната, но дека е важно да се забележи дека конфликтот е заснован на неиспровоцираната инвазија на Русија на украинската суверена територија.
„Русите се напаѓачите… Ова е војна на наша територија, тие дојдоа да нападнат. Кина, како голема и моќна земја, би можела да дојде и некако да ја стави Руската федерација [на] одредено место. Се разбира, навистина би сакал Кина да го преиспита својот став кон Руската Федерација“, рече украинскиот претседател.
Зеленски истакна дека верува оти Кина има економски лостови да го притисне Путин да стави крај на војната.
„Сигурен сум дека без кинескиот пазар за Руската Федерација, Русија би чувствувала целосна економска изолација. Тоа е нешто што Кина може да го направи – да ја ограничи трговијата (со Русија) додека не заврши војната“, рече тој.
Според Зеленски, руската влада ги троши дополнителните средства добиени од високите цени на енергијата не за подигнување на животниот стандард на своите граѓани, туку за „конкретно оружје што тие го користат за борба против Украина“.
„Ова е нешто што треба да се запре“, рече тој.
Украинскиот лидер, исто така, потсети на неговото неодамнешно предупредување за долгорочните импликации на војната врз глобалната безбедност на храната и енергијата. Зеленски рече дека кинескиот извоз може да биде негативно погоден од земјите што трошат повеќе на храна, гориво и одбрана по конфликтот.
„Луѓето би морале да плаќаат за енергетски ресурси наместо за производи кои доаѓаат од Кина… Извозот од Кина би се намалувал. Тоа е 100 отсто“, рече тој.
Украинскиот претседател зборуваше и за шпекулациите дека Руската Федерација, која во моментов се соочува со тешки западни санкции низ различни сектори, набавува полупроводници од азиските земји надвор од дипломатската амбиција на Западот, за да произведува оружје. Зеленски рече дека кијивските разузнавачки служби „работат подеднакво ефикасно како во Кина“ и дека неговата администрација е добро запознаена на кои земји се обратила Москва за помош во овој поглед.
Сепак, Зеленски рече дека не би сакал да покажува со прст кон овие влади, туку повеќе да се фокусира на нивно обединување против Русија.
„Би сакал да се концентрирам на обединување на целиот свет против тиранијата во Русија, а не… да го поткопувам единството велејќи дека едната земја помага, другата не“, рече украинскиот претседател.
Зеленски претходно го повика светот да преземе важен чекор и да ја назначи Руската Федерација за државен спонзор на тероризмот.
Подготви: Ј. Ѓ.