Пишува: БРАНКО ТРИЧКОВСКИ
Тој вели, ајде дами и господа, мораме да се качиме на бродот, одиме на нова планета, не смееме да останеме тука, а тие велат не, не, немојте да бегате од вистинското прашање, а тоа е: како се вработени тетката од сестра и снајката од прв братучед на докторот од Штип, чиј шура е шеф на космичката агенција на Мелмак, така некако, потоа тој објаснува од какво значење се презентациите, разговорите и договорите кои се направени за време на винскиот саем во Белград, не само за извозот на вино, а тие прашуваат колку души биле во расипничката делегација и колку чаши испиле со парите на народот, тој говори за епските целогодишни, непрекинати напори да се преброди енергетската криза, тие викаат ама како тоа во пет до дванаесет ќе одите во Бугарија. Или се фаќаат за некоја слична пропагандна флоскула собрана од плитките мозочни фиоки на опозициското зло.
Неверојатни работи.
Прашањата сами по себе не се нелегитимни, молам, интересот за нечие вработување е сосема на место, или колку чаши вино испил шефот на македонската делегација и кој тоа го платил, но контекстот и адресата се промашени, бе, другари, тоа е како во екот на војната и енергетската криза некој да го прашува Шолц зошто сојузната влада не преземе нешто рускиот гас да им мириса на колонска вода. Прашање е дали од неукост или од злоба. Но, мене ми се чини дека таканаречените новинари настапуваат како да се припадници на некаква македонска вагнеријанска формација за уривање на власта. Така се препарирани. Во Специјалната операција за освојување на медиумскиот простор.
Тие се шприцеви преку кои на луѓето им се даваат одредени супстанци за контрола на поведението преку плакнење на мозоците. И потоа се посматра нивното однесување. Вие сте инструмент, луѓето се заморчиња. Македонија е мала. Сто ушприцани типови во нашата фамилијарна и инцестуозна средина, можат да ја прошират болеста на глупоста кај 10.000 соплеменици. Тоа значи дека за тотално оглупавена нација вие треба да испразните 20.000 шприца.
Не ми се гледаат многу.
Хахаха!
Текстот е личен став на Авторот.
