Амбасадорката на Украина во Скопје, Лариса Дир, одржа средба со Претседателот на Пратеничката група на Собранието на Република Северна Македонија за меѓупарламентарни односи со Украина, Јован Митрески.
Соговорниците, како што наведуваат од украинската амбасада, го забележаа високото ниво на билатерална соработка меѓу двете земји, особено на меѓупарламентарно ниво.
„Благодарни сме ѝ на Северна Македонија за непоколебливата поддршка на Украина во нејзиното спротивставување на руската агресија, како и за помошта што ѝ ја дава на нашата држава во сите сфери. Усвоената од страна на Собранието на 3 март оваа година Декларацијата за осуда на воените дејствија на Руската федерација, кои го загрозуваат територијалниот интегритет и суверенитет на Украина, стана исклучително важна манифестација на солидарност со украинскиот народ во првите денови од руската инвазија“, нагласуваат од украинската амбасада.
„Денес на Украина повеќе од кога било има потреба од консолидирање на напорите на своите партнери за да го порази агресорот, бидејќи само заедно можеме да го надминеме ова страшно зло. И гласот на парламентарците овде звучи исклучително важно. Сигурни сме дека пратениците во македонското Собрание ќе продолжат да заземаат јасен став во однос на злосторствата на русија против Украина и Украинците. Сепак, ова не е ништо повеќе од продолжување на вековната империјална политика на геноцид врз нашиот народ“, истакнува амбасадорката Лариса Дир.
Митрески, на средбата, уште еднаш изрази поддршка за храбрата борба на украинскиот народ и украинските институции за враќање на мирот и надминување на последиците од руската агресија, посочувајќи дека тоа истовремено претставува борба за демократските вредности и за заштита на меѓународниот поредок.
Митрески се осврна на плодната соработка меѓу двата парламенти, а особено меѓу пратеничките групи за соработка, која во последниве години бележи значајна динамика. Тој потсети и дека Собранието на Република Северна Македонија, уште на 3 март, донесе Декларација за осуда на воените напади кои го загрозуваат територијалниот интегритет и суверенитет на Украина.
Исто така, Митрески нагласи дека на Првиот парламентарен самит на Меѓународната платформа за Крим, што ќе се одржи на 25 октомври во Загреб, ќе биде инаугурирана парламентарната димензија на Кримската платформа.
Тој упати честитки до Украина за добивањето на кандидатски статус во ЕУ, изразувајќи подготвеност за поддршка од нашата земја со експертиза и искуство во процесот на евроинтеграцијата.
„Како земја-членка на НАТО, заедно со сојузниците, сме обединети во одговорот на руската агресија врз Украина и имаме преземено низа чекори и мерки како одговор на воени дејствија“, рече Митревски.
Ј. Ѓ.
