Милијардерот Илон Маск се предомисли и сега повторно е заинтересиран да го купи Твитер, но овој пат по првичната цена од 54,20 долари по акција, пренесуваат медиумите повикувајќи се на добро упатени извори. Договорот за купување би можел да биде постигнат веќе в петок, додаваат изворите.
Акциите на Твитер се зголемија за дури 15 отсто откако Блумберг прв ги објави плановите на извршниот директор на Тесла да продолжи со договорот за купување на компанијата. Тргувањето со тие акции на Твитер потоа беше прекинато. Маск наводно му пишал на Твитер и така ги открил своите планови. Досега ниту еден не одговорил на барањата за коментар.
Предлогот на Маск да се усогласи со првичните услови на договорот значи дека Твитер се соочува со иднина под водство на милијардер кој со месеци јавно го критикуваше неговото раководство и ја доведуваше во прашање неговата вредност. Тоа исто така значи дека неговите тврдења – за тоа колку корисниците на Твитер се ботови, на пример – веројатно нема да бидат внимателно разгледани во судница.
Во април, Маск се согласи да го купи Твитер за 44 милијарди долари, а потоа се обидуваше да се откаже од договорот за купување. Тој тврдеше дека Твитер го довел во заблуда со информациите за количината на ботови, автоматизирани профили зад кои не стојат вистински луѓе. Тој официјално го раскина договорот во јули, а Твитер го тужеше пред судот во Делавер за да го принуди да продолжи со купувањето. Почетокот на судењето е закажан за 17 октомври.
Акционерите на Твитер на 13 септември гласаа за прифаќање на понудата за откуп што ја доставил Маск. Компанијата тогаш соопшти дека 98,6 отсто од гласовите биле за договорот. Според луѓе блиски до договорот, Маск, најголемиот акционер на Твитер, воопшто не гласал. Маск поседувал речиси 10 проценти од Твитер, повеќе од 73 милиони акции, кога се согласи да ја купи компанијата.
