Премиерот Димитар Ковачевски во гостување во информативниот магазин „Клик Плус“ на ТВ21 вели дека стагфлацијата не е непознат во економијата и го има и во другите држави. Стагфлација е состојба на економијата која се карактеризира со општ скок на цените инфлација со пад на производството.
„Тоа е дел од извештајот на Светската банка кој што се однесува на Северна Македонија, меѓутоа доколку ги видите извештаите и за другите држави, тогаш ќе видите дека тој феномен важи и за другите држави, вклучително најмногу европските држави. Феноменот на стаглфлација не е непознат во економијата, тој се има случувано, тоа се негативни стапки на економски раст, намалување на невработеноста и зголемување на инфлацијата“, рече Ковачевски.
Премиерот Ковачевски рече дека привршуваат преговорите со ММФ и очекуваат позитивни одговори. Ковачевски додаде дека има зголемување на цените на основните продукти и енергенсите, поради што Владата ги замрзнала маржите на истите.
„Ги привршуваме и преговорите со ММФ со позитивни очекувања. Сметам дека во наредните неколку дена, Министерот за финансии ќе има позитивна вест и за економијата, за буџетот и за граѓаните од преговорите со ММФ“ рече Ковачевски.
Премиерот додаде дека Владата е во постојана комуникација со стопанските комари и бара решенија за нивните високи сметки на струја. Како што кажа Ковачевски, начините на кои може да се помогне е со набавка на електрична енергија по пониска цена или субвенционирање на електричната енергија што ја плаќаат компаниите.
„Дадовме задача како Влада на државниот производител, ЕСМ, да го зголеми производството за 25 отсто. Тие го надминаа тоа за 2 отсто и за 27 отсто е зголемено производството. Целиот регулиран пазар е задоволен од наше производство на струја“ изјави премиерот Димитар Ковачевски во „Клик плус“ на ТВ21.
Тој додаде дека иако државата работи со производствени капацитети изградени во поранешна Југославија, сепак се постигнува.
„Во земјава не е инвестирано 30 години во голем електро-енергетнски капацитет. Како што тече производството на струја во РЕК Битола, така се прави ремонт на вториот блок“ рече Ковачевски.
Премиерот додаде дека до Собранието се поднесени и законски измени со цел олабавување на процедурите за инсталација на фотоволтаици, како за домаќинствата, така и за компаниите.
