„Наметната е дилемата дека е барање на Бугарите за да влезат во Уставот, па ние сме попуштиле. Не, сами сме барале и во 1991 и во 2001, а според мои информации и во 2018 година. Не се случило бидејќи тие не сакале, бидејќи сме биле ист народ“ изјави координаторот на пратеничката група на СДСМ, Јован Митрески во „24 анализа“ на ТВ24.
Тој додаде дека со внесувањето на Бугарите во македонскиот Устав се прави дистинкција дека постои македонски народ, различен од бугарскиот народ.
„Ова е борба и заштита на идентитетот. Дека македонскиот народ е посебен, бугарскиот народ е посебен. Ја кршиме флоскулата за еден народ во две држави, која трае уште од 1991 година“ рече Митрески.
Пратеникот кажа дека верува оти има искусни и чесни пратеници кои ќе ги поддржат уставните измени.
