Лажните дојави за бомби се неумесна акција со цел да се направи паника и предизвика недоверба кај населението. Од оваа перспектива, гледано што се случува во Украина, не е за чудење, изјави вечерва министерката за одбрана, Славјанка Петровска во „Топ тема“ на Телма.
Таа додаде дека иако ваквите пријави се надлежност на МВР, сепак Министерството за одбрана споделува информации со МВР и Агенцијата за национална безбедност со цел да се помогне истрагата.
Министерката Петровска додаде дека и кибер-нападите со кои се соочува државата се во насока на креирање на мислење кај народот дека институциите немаат капацитет за да се справат. Сепак, таа кажа дека земјава има национална стратегија за кибер-безбедност.
Вклучени сме во она што значи развивање на домашните капацитети, но и унапредување и надоградување за справување. Тоа е процес кој нема почеток и крај, туку само надоградба, истакна Петровска.
