Со шефот на грчката дипломатија Никос Дендиас и министерот за животна средина и енергетика на Грција Ксотас Скрекас, ќе оствари средби министерот за надворешни работи на Северна Македонија, Бујар Османи за време на неговата денешна работна посета на Грција јави дописничката на МИА од Атина.
Централната средба на посетата е точно напладне со Дендиас, а како што соопштија од МНР, „во фокусот на разговорите ќе бидат билатералните односи и соработката меѓу двете земји, европското досие на нашата земја, сојузништвото во НАТО и геополитичките предизвици во регионот, како и приоритетите на претстојното претседавање на Северна Македонија со ОБСЕ во 2023 година“.
Од грчкото МНР во најавата за средбата соопштија дека се очекува разговорите на двајцата министри да се фокусираат на „преземањето на претседавањето со ОБСЕ од страна на Северна Македонија, европскиот тек на Западен Балкан, целосното, доследно и добронамерно спроведување на Договорот од Преспа, дополнително зајакнување на билатералните односи во сите област, како и во регионалните и меѓународните случувања“.
Османи и Дендиас ќе имаат тет-а-тет средба во грчкото МНР, по што ќе следи состанок на двете делегации, изјави за медиумите, како и работен ручек.
Во рамки на посетата на Грција, Османи ќе оствари одвоена средба и со министерот за енергетика и животна средина, Костас Скрекас, на која ќе се разменат информации за соработката меѓу двете земји во областа на енергетиката, а во контекст на актуелните предизвици поврзани со диверзификацијата на изворите за енергетско снабдување
