Ројтерс објави прилог под наслов „Сликите на годината: Како Украина ја издржа руската агресија која требаше да трае само неколку дена?“ во која објави дел од потресните фото сведоштва на своите репортери.
„Веќе сме на крајот на 2022 година, а војната во Украина влегува во истекот на првата зима. Украинците го изненадија светот, а и самите себе. Тие го издржаа сеопфатниот воен напад и бескомпромисната руска агресија, која важи за суперсила што требаше да ги уништи за неколку дена“ – пишува во прилогот на Ројтерс.
Понатаму, во краткиот текст, прошаран со фотографии кои го обиколија светот, јавноста се потсетува на тоа дека милиони Украинци станаа бегалци, но и дека милиони се кријат од бомбардирањето во подруми и засолништа. Десетици илјади загинаа во градовите уништени од рускиот агресор.
„И милиони се собраа за каузата на една нација, земајќи оружје, волонтирајќи во амбулантни возила, носејќи храна до селата на фронтот, грижејќи се еден за друг за децата“ – пишува во прилогот на светската новинска агенција.
„Кога Русија ја нападна Украина, Вадим Хлупианец, 26-годишен балетан од киевскиот Национален театар за оперета, се приклучи на војската. Девет месеци подоцна, тој беше убиен со снајпер на источниот фронт“ – пишува Ројтерс.
На неговиот погреб, креативниот директор на театарот Бохдан Струтниски рече дека младиот балетан заслужува многу поинаква чест: „Аплауз на крајот од претставата, со луѓе кои бараат бис“.
Понатаму, Ројтерс согледува дека Украинците ја гледаат оваа борба како егзистенцијална – национална и лична борба, бидејќи рускиот агресор го прогласува украинскиот идентитет за лажен, а одземената територија за своја.
„Сега, со почетокот на првата зима на војната, Русија е таа што е во дефанзива, подготвувајќи стотици илјади резервисти за да ја заштити преостанатата окупирана територија – околу една петтина од Украина. Воените експерти кои некогаш дебатираа дали Киев може да издржи повеќе од неколку дена, сега разговараат дали може целосно да ја добие војната. Киев вели дека нема да запре додека не ги истера сите руски сили, вклучително и од териториите окупирани од 2014 година“ – пишува Ројтерс.
Што значи тоа за 2023 година?
Бруталната зима им носи предности на Украинците кои ја бранат сопствената земја од регрутираните резервисти кои Русија мора да ги нахрани и снабдува илјадници километри од дома.
„Украина досега беше маестрална во напаѓањето и поразувањето на руските сили“, напиша на Твитер Марк Хертлинг, поранешен командант на копнените сили на САД во Европа. Но, нејзините следни цели – да ја пробие зацврстената руска одбрана на исток и да ја премине реката Днепро на југ – се меѓу најтешките со кои може да се соочи некоја војска, рече тој и додаде – „Ќе успеат, но не брзо.“
Во меѓувреме, нема разговори за завршување на војната, а ниту за прекин на огнот. Киев вели дека дури и привременото примирје ќе ѝ даде шанса на Русија да се прегрупира и да ја зацврсти својата контрола врз окупираната земја.
Од друга страна, пак, како што завршува 2022 година, Русија фрла проектили врз енергетската инфраструктура на Украина, оставајќи милиони Украинци во темнина и студ, а со тоа нанесува голема штета на цивилите во Украина.
Така што, очигледно руската агресија е бескомпромисна и ќе продолжи и во текот на 2023 година, а Украинците ќе продолжат и понатаму обединети да се борат за она што им е одземено.
А. Ристески
