Двајца мажи се обесени денеска во Иран поради наводно убиство на припадник на армијата за време на протестите ширум земјата. Мохамед Махди Карами и Сејед Мохамад Хосеини беа прогласени за виновни за „корупција во земјата“ поради нивна наводна вмешаност во смртта на паравоен офицер.
Организациите за човекови права тврдат дека тие се осудени во „лажен процес“. Семејството на 22-годишниот Карами вели дека не смееле да го видат пред да биде егзекутиран. Обвинителите тврдат дека паравоениот офицер Рухола Аџамијан бил соблечен гол и убиен од неколку луѓе кои оддавале почит на една од жртвите на протестот, јави Би-Би-Си.
Протестите против иранскиот режим избувнаа во септември минатата година по смртта во притвор на младата девојка Махса Амини приведена од полицијата за морал поради наводно „непрописно“ носење хиџаб. Според организациите за заштита на човекови права, досега се убиени најмалку 516 демонстранти, меѓу кои 70 деца, а 19.262 се уапсени. Тие пријавија и убиство на 68 припадници на обезбедувањето.
Многумина од приведените по протестите наводно исчезнале, биле приведени без обвинение, мачени или малтретирани на други начини.
Двајцата мажи првпат беа осудени на смрт во декември 2022 година, но поднесоа жалба на нивните казни и тврдеа дека биле мачени за да дадат лажни признанија. Адвокатите кои го застапуваат Хосеини рекоа дека тој бил претепан и му биле врзани очите додека бил в затвор.
Пред егзекуциите, Карами штрајкувал со глад бидејќи му било ускратено правото да избере свој адвокат за правна постапка. Амнести интернешнал го опиша судењето како „брзо и нефер групно судење“ и објави дека иранските власти бараат смртна казна за најмалку 26 други.
Во истиот случај на смрт беа осудени уште тројца мажи, а 11 добија затворски казни. Со овие бесење, бројот на убиени демонстранти по судењето се зголеми на четири.
Во декември, 23-годишниот Маџидреза Рахнавард беше јавно обесен бидејќи наводно избодел со нож двајца припадници на безбедносните сили и ранил уште четворица, а 23-годишниот Мохсен Шекари е убиен дека наводно блокирал улица и со нож ранил припадник на иранските сили Басиџ.
