Новиот директор на МКЦ е Никола Алексов, кој доаѓа по разрешувањето на в.д. директорот Ванчо Богоев. Алексов е дипломиран детектив по професија, кој воопшто не е познат на вработените во МКЦ и на културната јавност.
Фронтлајн се обиде телефонски да разговара со новиот директор Алексов, но тој не сакаше да разговара со образложение дека бил „со луѓе во гужва“.
Деновиве МКЦ повторно е на мета на партиските игри, информација која веќе е пласирана во јавноста.
„Во попладневните часови вчера, постоечкиот в.д. директор на МКЦ, Ванчо Богоев кој 36 години е дел од институцијата и кој со својот едвај целогодишен мандат продолжи во насока на растење и одржување на програмата на МКЦ, беше сменет од својата позиција поради неподлегнување на екстремните притисоци од Генералниот секретар на Град Скопје да потпише вработување за Арбен Шаќири“, реагираат од МКЦ на Фејсбук.
„Бидејќи, сега веќе екс директорот на МКЦ не ја потпиша таа одлука, од утре МКЦ има нов в.д. директор, Никола Алексов, дипломиран детектив, кој е примен пред два дена преку Агенција за привремени вработувања во МКЦ без никакво искуство и позадина во културна институција.
И покрај признанието кое дојде како круна на нашето работење со наградата “13 Ноември” за заслуги во областа на културата и масовната посетеност, можеби и најголема во историјата на институцијата по повод 50 годишниот јубилеј, годината почна со лоши вести за иднината на МКЦ. Првата е онаа дека буџетот ни е доведен до само 8% од годишниот буџет со кој работевме минатите години, а веднаш потоа и последните случувања во начинот на инсталирање на директор во МКЦ.
Овој допис доаѓа како потреба за разјаснување на ситуацијата која се наметна, истовремено и поради сомнежот во законитоста на овие решенија бидејќи со ова, се одбегнува повотрно можноста да јавно се спроведе отворен конкурс за директор, на кој отворено и транспарентно би можеле да се пријават сите квалификувани професионалци од областа на културата“, стои во објавата на Програмскиот колегиум на МКЦ на Фејсбук профилот на институцијата.
А.Р.
