Ова е прва година наназад гледано во којашто ја дефинираме висината на минималната пата без да преговараме, бидејќи таа е утврдена според методологијата со новиот закон, изјави вицепремиерот за економски прашања Фатмир Битиќи во гостувањето на ТВ Стар. Според него тоа е системско решавање на проблемите, без закани и уцени.
Конечно не се пазариме и не преговараме за достоинството на работник. Дали е денеска вицепремиер Битиќи или некој друг, ќе нема значење, бидејќи ќе нема преговори, тоа е клучно и тоа е најголемата победа на работникот. Ова да се случеше пред 15 години за оваа тема и за миграцијата воопшто немаше да зборуваме. Ова да се случеше пред 15 години сега минималната плата природно ќе се искачеше на 30 илјади денари, истакна Битиќи.
Тој додаде дека зголемувањето на минималната плата влијае на порастот на просечната плата која сега изнесува над 34 илјади денари.
Тенденцијата е сигурна, нагорната линија на зголемување на плати е сигурна, нагласи Битиќи, додавајќи дека во јуни ќе може веќе да се предвиди колкав ќе биде износот на минималната плата за наредната година.
