Украина денес се наоѓа во 398-от ден војна, откако Русија изврши инвазија врз земјата.
Ова се главните теми кои го одбележаа денешниот ден.
Политика
Германската влада планира значително зголемување на воената помош за Украина. За таа цел, буџетската комисија на утрешната седница сака да одобри дополнителни средства во износ од 12 милијарди евра.
Стејт департментот на САД го поддржува развојот на „меѓународен трибунал“ за кривично гонење на руското злосторство за агресија врз Украина, изјави Бет Ван Шак, Амбасадорка за глобална кривична правда.
Литванската влада се подготвува да и префрли на Украина модуларен град наменет за 36 семејства.
Украинскиот претседател Володимир Зеленски може да ја посети Варшава „во блиска иднина“, но патувањето нема да биде однапред објавено од безбедносни причини.
Руската инвазија доведе до уништување на стотици верски објекти од сите конфесии во Украина, соопшти денеска украинскиот претседателот Володимир Зеленски преку социјалните мрежи.
Според тројца високи функционери информирани за дискусиите по последната закана од Москва, американските и европските претставници веруваат дека Владимир Путин нема намера да распореди нуклеарно оружје во Белорусија во скоро време.
Треба да почнат подготовките за обнова на Украина и за справување со штетите од војната, изјави германската министерка за економска соработка и развој Свења Шулце на заедничката прес-конференција со украинскиот амбасадор во Берлин Олексиј Макеев.
Во Чешка, која од почетокот на војната во Украина привремено прими 502.000 бегалци од таа земја погодена од војна, останаа помалку од 300.000 Украинци.
Воена помош
Украина доби три тенкови Леопард 2А6 од Португалија, објави Министерството за национална одбрана на Португалија.
Првите британски тенкови „Челинџер“ пристигнаа во Украина за да помогнат во спротивставувањето на руската инвазија, соопшти украинскиот министер за одбрана Олексеј Резников.
На фронтот
Многумина веруваа дека во средината на март судбината на Бахмут е запечатена, а градот е осуден да падне во руски раце. Сепак, откако украинските сили се повлекоа од источниот дел на градот и ги заштитија линиите за снабдување јужно од Бахмут, веројатно е дека руските сили нема да успеат да го заземат уште долго време, ако тоа воопшто и се случи. Се чини дека Москва го сфати ова и на тој начин руските сили го намалија интензитетот на нивните напади додека ги преместува трупите на друго место.
Украинските власти соопштија дека противвоздушната одбрана соборила руски беспилотни летала во близина на Кијив, чии остатоци предизвикале пожар во нестанбена зграда и оти во нападот нема жртви.
Британско разузнавање: Русите имаат тешки загуби во тенкови, дисциплината во нивниот корпус се распадна.
Ноќта на 28 март 2023 година, руските трупи извршија минофрлачки и артилериски напади врз градот Херсон, погодувајќи болница и пошта.
Вкупно 465 деца се убиени, а над 943 повредени во Украина од почетокот на руската инвазија, изјави Украинското државно обвинителство.
Подготви: А. Ристески
