Од Белата куќа изјавија дека се длабоко загрижени од „вознемирувачките“ извештаи за задржувањето на американскиот граѓанин Еван Гершкович во Русија и најостро го осудуваат овој чин.
– Таргетирањето американски граѓани од страна на руската влада е неприфатливо, истакна портпаролката Карин Жан-Пјер.
Се наведува дека службеници од Белата куќа и Стејт департментот синоќа зборувале со претставници на „Волстрит журнал“, каде што работи Гершкович. Администрацијата исто така е во контакт со неговото семејство. Стејт департментот е во директна врска и со руската влада „активно работејќи да се осигура конзуларен пристап за Гершкович, соопштија од Белата куќа.
„Најостро го осудуваме апсењето на Гершкович. Исто така го осудуваме континуираното таргетирање и репресии врз новинарите и слободата на печатот од страна на руската влада,“ рече Жан-Пјер.
Од Белата куќа повторно истакнуваат дека Американците треба да посветуваат внимание на предупредувањето на владата на САД да не се патува во Русија. Американските граѓани кои престојуваат или патуваат во Русија треба веднаш да заминат, препорачува и Стејт департментот.
Американскиот државен секретар Ентони Блинкен денеска изјави дека е „длабоко загрижен“ од руското апсење на американски новинар и ги осуди напорите на Москва да ги „казни“ медиумите.
„Длабоко сме загрижени поради широко објавеното притворање на американски државјанин – новинар во Русија“, рече Блинкен во изјавата, мислејќи на новинарот на „Вол Стрит Журнал“, Еван Гершкович.
САД генерално избегнуваат да ги именуваат државјаните уапсени во странство без да добијат формална дозвола од нивните семејства.
