„Армијата на Русија продолжува да врши ужасни воени злосторства во Украина. Запрепастени од појавувањето на видеото од 11 април на кое се гледа како руски војници егзекутираат украински заробеник. Позирајќи пред камерата, руските џелати со посебен цинизам му го одземаат животот на човекот“, реагираат во објава на фејсбук од украинското Министерство за надорешни работи.
„Ова не е прв случај на флагрантен нехуман третман на украински заробеници од страна на руските војници. Илјадници случаи имаше во Буча, Ирпин, Гостомел, Бородјанка, Мариупол и други украински градови и села. рф намерно спроведува во Украина политика на тортура, физичко малтретирање, нехумано постапување, намерно нанесување на тешки страдања, сериозни телесни повреди и намерно убивање како на заробениот воен персонал, така и на цивили“, истакнуваат од МНР на Украина.
Оттаму нагласуваат дека „убиството на украински заробеник прикажано на видео е сериозно кршење на Женевските конвенции и е воено злосторство во согласност со одредбите на Кривичниот законик на Украина и Римскиот статут на Меѓународниот кривичен суд. Според Римскиот статут, ваквите дејствија може да бидат квалификувани и како злосторство против човештвото“.
МНР на Украина ја повикуваме Канцеларијата на Обвинителот на Меѓународниот кривичен суд неодложно да обрне внимание на уште едно, како што велат, „злосторство на руските војници во контекст на истражувањето на воени злосторства и злосторства против човештвото извршени од граѓани на Руската Федерација на територијата на Украина“.
„Сите лица вклучени во злосторствата во Украина – како највисокото раководство на рф, така и директните извршители – безусловно ќе бидат казнети. Исто така, ја повикуваме и меѓународната заедница да преземе решителни и итни мерки за зголемување на помошта за Украина со цел да се заштитат Украинците од рускиот геноцид и да се ослободат сите наши територии“, се наведува во соопштението на украинското МНР.
