Коментарите на руските функционери продолжуваат да покажуваат општа нервоза за потенцијалната украинска контраофанзива, објави Институтот за проучување на војната (ИСВ) во својот најнов извештај.
Финансиерот на групацијата Вагнер, Евгениј Пригожин, вчера истакна дека штом се подобрат временските услови во Бахмут, Украина ќе започне контраофанзива, што може да се совпадне со празникот Денот на победата на Русија, 9 мај, и оти Украина можеби има намера да ја уништи руската прослава, пренесе Институтот во извештајот.
ИСВ, исто така, наведува дека Русија се чини дека продолжува со „намерна депопулација“ на окупираните делови на Украина со цел да ги насели со Руси.
Велат и дека во Бахмут веројатно се зголемува конкуренцијата меѓу руските приватни воени компании. Членовите на Поток (наводно еден од трите волонтерски одреди на руската државна енергетска компанија Газпром) во видео му се пожалиле на Путин дека претставници на Газпром им рекле дека ќе потпишат договори, но потоа биле принудени да потпишат договори со друга приватна единица, Редут.
Институтот за проучување на војната наведува дека Кремљ продолжува со мерките кои овозможуваат зголемување на домашната репресија. Тие напоменуваат дека на 26 април Рускиот совет на Федерацијата одобри три закони со кои ќе се овозможи лишување од руско државјанство за оние кои ги дискредитираат руските вооружени сили и за дејствија кои ја загрозуваат националната безбедност, а исто така ќе овозможат доживотни затворски казни за велепредавство и петгодишни казни за оние кои ги промовираат одлуките на меѓународните организации во кои Русија не учествува.
ИСВ се осврна и на вчерашниот долгоочекуван телефонски разговор меѓу Зеленски и Си. Тие известуваат дека кинескиот претседател Си Џинпинг изјавил оти заемното почитување на суверенитетот и територијалниот интегритет е основата на украинско-кинеските односи во разговор со украинскиот претседател Володимир Зеленски. Институтот заклучува дека изјавата на Си јасно ја опишува позицијата на Кина за независноста на Украина, отфрлајќи ги изјавите на кинескиот амбасадор во Франција Лу Шаје од 22 април дека на постсоветските држави им недостасува основа за суверенитет.
