„По кој пат штипјани ќе плаќаат за бизнис зделките и апсурдни проекти на ВМРО-ДПМНЕ и вд. директорката на штипската гимназија? Речиси 2 милиони денари, пари на граѓаните, залудно се потрошени за изградба на, замислете, фонтана на местото на веќе постоечка фонтана“, во објава на Фејсбук во декември минатата година реагираа од СДСМ Штип.
Оттаму прашаа како вд. директорката пренаменила пари наменети за реконструкција на кровот на гимназијата, за изградба на фонтана која не е во дворот ниту во катастарската парцела на самата гимназија.
„Ја прашуваме вд. директорката на гимназијата и училишниот одбор , како тоа врши пренамена на средства предвидени за реконструкција на кровот на гимназијата, во изградба на фонтана, која патем не е во дворот ниту во катастарската парцела на самата гимназија. Дали наместо во енергетско ефикасна фасада или во училишни помагала, власта гради нешто што веќе беше уредено? Дали повторно вмровските челници прават обид да бркнат со рацете во медот, злоупотребувајќи ги народните пари и задоволувајќи нечии бизнис интереси?“, реагираа тогаш од СДСМ Штип.
Дали по примерот на Скопје 2014та, Јорданов планира непродуктивно да ги троши народните пари во неоправдани проекти, прашаа од СДСМ Штип.
„Јорданов бегајќи од одговори, повторно го прашуваме, како тоа самопрогласената директорка и училишниот одбор на гимназијата, градат фонтана која ниту е во дворот ниту во катастарската парцела на самата гимназија?“, рекоа од СДСМ Штип.
„Дали Јорданов и вд. директорката градат дивоградба? Дали Јорданов при увид на овие градежни активности планира уште пред да биде изградена фонтаната, да ја руши?“, прашаа од СДСМ Штип.
Средствата на гимназијата треба да бидат наменети за училиштето , за подобри услови на учениците и вработените, а не да се инвестираат за градба на туѓо земјиште, потенцираа во декември минатата година од СДСМ Штип.
Во денешната изјава за Фронтлајн, СДСМ Штип велат дека „фонтаната сега, после инвестицијата направена во реновирање, е во очајна состојба и се шири реа од неа“.
„Не е јасно како тогашната в.д. директорк ги пренаменила средствата, бидејќи тоа е практично невозможно да се стори, имајќи предвид дека: 1. Средствата имаат точна, прецизна намена. 2. Инвестицијата за која таа ги пренаменила средствата, односно реконструкција на фонтаната, се однесуваат на сосема друга парцела. Фонтаната е на парцела до гимназијата, но нема никаква врска со парцелата на гимназијата. Дополнително што самото градење фонтана и нејзино реновирање никогаш не било регулирано од Совет, ниту преку ДУП, па тоа е, впрочем, по сите закони и прописи – дивоградба. Фонтаната сега, после инвестицијата направена во реновирање, е во очајна состојба и се шири реа од неа“, изјавуваат за Фронтлајн од СДСМ Штип.
