На Кеј Македонија во Охрид од 22 до 24 јуни ќе се одржи второто издание на фестивалот на виното „Ohrid Wine Festival“, во организација на Крафт Продукција, а под покровителство на Општина Охрид.
Целта на фестивалот, како што соопшти денеска организаторот, е да се прослави виното преку убава музика, храна, дружење и забава.
– Покрај промоцијата за најдобрите македонски вина, целта на фестивалот е дополнително да даде поддршка на македонски изведувачи, па очекувајте одлични имиња од македонската домашна музичка сцена, стои во соопштението.
Општина Охрид ги повикува туристите од земјава и странство на вистинско уживање во вкусот и традицијата на македонските вина и македонската храна.
– По успешното прво издание, кое покажа дека Охрид е вистинско место за промоција на винската култура и гастрономија, очекуваме оваа година покрај домашните гости да ги задоволиме вкусовите на сите туристи кои во овој период ќе бидат присутни во Охрид, информира Општина Охрид.
