Шефот на „Вагнер“, Јевгениј Пригожин штотуку објави 11-минутна аудио порака, прва по неуспешниот бунт, што тој го организираше во саботата, објави Би Би Си.
Во пораката тој вели дека причината за бунтот е тоа што никој од командантите не се согласил да потпише договор со руското Министерство за одбрана и дека поради тоа неговата платеничка група била принудена да престане да постои на 1 јули.
„Командантите на Вагнер мислеа дека ако потпишат со Министерството за одбрана, ќе се претворат во топовско месо поради начинот на кој регуларната армија се покажа во акциите“, рече Пригожин.
Тој додаде дека некои борци одлучиле да се приклучат на силите на Министерството за одбрана, но дека тоа е малцинство.
„Ние бевме категорично против тоа… но правевме план, планиравме да излеземе на 30 јуни во Ростов и јавно да ја пренесеме нашата опрема во близина на раководството на армијата. Сепак, и покрај тоа што не покажавме никаква агресија , бевме погодени. Во воздушниот напад загинаа 30 борци. Целта на нашата акција беше да го спречиме уништувањето на „Вагнер“ и да ги изведеме пред лицето на правдата оние кои со своите непрофесионални постапки направија голем број грешки во текот на специјалната воена операција. За ова постоеше барање во јавноста“, рече меѓу другото првиот човек на „Вагнер“.
Тој нагласи дека целта на бунтот не била соборување на руското политичко раководство, туку да се повикаат на одговорност воените претставници, а походот на „Вагнер“ кон Москва покажува „сериозни безбедносни проблеми“ во Русија.
Пригожин истакна дека Вагнер жали „што морале да ја погодат руската авијација“ и дека се повлекле „за да не се пролее крвта на руските војници“.
„Целта на маршот беше да се избегне уништувањето на „Вагнер“ и да се повикаат на одговорност официјалните лица кои направија огромен број грешки со своите непрофесионални постапки“, рече тој.
Во својата аудио порака тој не ја откри својата локација.
Г. Т.
