„Упатувам искрени честитки до нашиот импозантен и исклучително почитуван македонски актер, Никола Ристановски, за наградата „Александар Лифка“ во регионална категорија на годинешното 30-то издание на реномираниот Фестивал на европски филм Палиќ, кој започнува утре“, сподели министерката за култура, Бисера Костадниовска Стојчевска.
„Европскиот филмски фестивал Палиќ, освен што се вбројува како еден од најзначајните филмски фестивали во соседна Србија и во регионот, исто така, се карактеризира и по целосната европска содржина што ја нуди за филмската публика.
Покрај нашиот Никола Ристановски, добитници на наградата „Александар Лифка“ се и српскиот актер Богдан Диклиќ за исклучителен придонес во европската кинематографија, како и режисерот Андреас Дрезен во категоријата странски дела.
Фестивалот има за цел на филмското платно да бидат промовирани најквалитетните остварувања во современата европска кинематографија, што ќе придонесе за културно зближување и побогат културно-уметничкиот живот во целиот балкански регион.
На фестивалот, покрај главната и натпреварувачката селекција, ќе бидат прикажани филмови и во неколку други селекции, а земја во фокусот на фестивалот е Северна Македонија, со шест филмови: „Чисто човечки“ на Игор Иванов, „Најсреќниот човек на светот“ на Теона Стругар Митевска, „Исцелител“ на Ѓорѓе Ставрески, „Мими“ на Даријан Пејовски, „Снежана на крајот мора да умре“ од Кристијан Ристески и „Сестри“ од Дина Дума. Програмата се реализира во соработка со Агенцијата за филм на Северна Македонија“, додаде министерката.
