Американската Влада додаде четири странски комерцијални шпионски ентитети на листата за трговски рестрикции заради ангажирање во активности спротивни на националната безбедност или надворешнополитичките интереси на САД, меѓу кои е и фирмата Сајтрокс АД од Северна Македонија.
Останатите три фирми се Интелекса С.А. од Грција, Интелекса Лимитед од Ирска и Сајтрокс Холдингс Црт од Унгарија, соопшти Стејт департментот.
Овие компании биле додадени на листата на ентитети врз основа на утврдување дека се занимаваат со трговија со кибер-експлоатации со цел да добијат пристап до информациски системи, доведувајќи ја во опасност приватноста и безбедноста на поединци и организации ширум светот.
Пролиферацијата на комерцијален шпионски софтвер носи посебни и растечки контраразузнавачки и безбедносни ризици за САД, вклучително и за безбедноста на персоналот на американската Влада и нивните семејства, се вели во соопштението од Стејт департментот.
Злоупотребата на овие алатки на глобално ниво, исто така, ја олеснува репресијата и овозможува кршење на човековите права, вклучително и заплашување на политичките противници и ограничување на несогласувањето, ограничување на слободата на изразување и следење и таргетирање на активисти и новинари.
Стејт департментот посочи дека денешната акција е дел од напорите да се спротивстави на ризиците од комерцијалниот шпионски софтвер.
Овие активности ја демонстрираат континуираната посветеност и лидерството на САД во борбата против злоупотребата на комерцијален шпионски софтвер и друга технологија за надзор. Тие го надополнуваат двопартиското законодавство на американскиот Конгрес со цел да се спречи ширењето и злоупотребата на овие алатки. Како дел од својата посветеност да ги стави човековите права во центарот на надворешната политика на земјата, САД работат на спротивставување на ширењето и злоупотребата на дигиталните алатки што се користат за репресија. Овој напор е насочен кон подобрување на дигиталната безбедност на граѓаните, борба против кибер заканите и отстранување на незаконскиот надзор.
Г. Т.
