Министерството за надворешни работи на Црна Гора, упати благодарност до Северна Македонија што овозможи евакуација на црногорски државјани од Израел, на летот обезбеден од македонската Влада.
„Црна Гора и е благодарна на Северна Македонија што им овозможи на црногорските државјани да бидат на нивниот хуманитарен лет. Благодарност и до амбасадите на Цена Гора во Скопје и македонските амбасади во Подгорица и Тел Авив за нивната посветеност за реализација на евакуацијата. Северна Македонија и Црна Гора, сојузници, партнери и пријатели“, пишува во објавата на Х од Министерството за надворешни работи на Црна Гора.
Crna Gora je zahvalna Sjevernoj Makedoniji što je omogućila da se na njihovom humanitarnom letu nađu i državljani Crne Gore.
Hvala i ambasadama 🇲🇪 u Skoplju i 🇲🇰 u Podgorici i Tel Avivu na posvećenosti realizaciji evakuacije.🇲🇪🤝🇲🇰, saveznici, partneri i prijatelji.@MFA_MKD
— MFA Montenegro (@MFA_MNE) October 14, 2023
За сите македонски државјани кои побараа помош за евакуирање од Израел беше обезбеден трансфер благодарение на напорите на Владата на Република Северна Македонија и премиерот Димитар Ковачевски, соопштуваат од Владата.
Сите финансиски трошоци за превезувањето на евакуираните граѓани се покриени со резерви на Буџетот на Република Северна Македонија, согласно одлуката донесена на седница на Владата.
„Бесплатниот чартер лет за сите патници кои патуваа на релација Тел Авив – Скопје беше реализиран во соработка со ‘Air Serbia’, и тоа во услови на откажани летови и целосно блокиран авионски сообраќај од и кон Израел. Со оглед на тековните борбени активности во повеќе подрачја во Израел изминатата недела, претходните обиди за обезбедување на лет од Тел Авив не вродија со резултат, имајќи предвид дека ниту една компанија од регионот не беше во можност да обезбеди сигурен и безбеден лет и да одговори на барањата на Владата на Република Северна Македонија“ соопштија од Владата.
Со авионот, освен преостанатите 67 македонски државјани, Владата на Северна Македонија излезе во пресрет и обезбеди трансфер и на седум албански, седум црногорски и тројца бугарски државјани.
Ј. Ѓ.
Поврзано:
