Пишува: ДЕСТАН ЈОНУЗИ
Секој политичар кој денес вели дека ги штити интересите на Северна Македонија спротивставувајќи се на меѓународните пријатели на Западот и САД, прави огромна грешка, а најлошото е што го доведува во заблуда народот и со тоа се оди кон историска неправда која може да биде фатална во овој турбулентен и неизвесен свет!
Авангарда на нашите интереси се САД и Западот, сојузот на слободните земји и оваа вистина не може да се покрие.
Со Западот, на чело со САД, постигнавме сè и без нив не можеме, освен ако не отвориме ровови и црни јами, во кои би влегле да се „заштитиме“ од империјализмот и вредностите на западната демократија. Секогаш кога нема доволно западни вредности во земји како Северна Македонија, портите на пеколот, ужасот и изолацијата се отвораат и ние добро го знаеме тоа.
Секое соочување со Западот и САД е во функција на унапредување на интересите на Русија, а ова е многу нездраво за „лошата здравствена состојба“ на Северна Македонија, за која се грижи САД – Западот и граѓаните.
Силно верувам дека реториката на опозициската ВМРО-ДПМНЕ, ултранационалистичката Левица, како и неодамна условувањето на уставните измени од страна на албанската опозиција, што го попречуваат патот на земјата кон Европската Унија, сега сериозно ги загрозува нашите органски сојузи со САД и Западот.
Жарот од антизападниот пожар сега изгледа мал и мораме да го изгасиме, бидејќи може да стане голем пожар, каде што сите можеме да изгориме.
Загрозувањето на здравите односи со Западот значи ставање краци во темелите на државата. Сите други оправдувања се целосно без политичка вредност, освен ако не се земат во функција за внатрешно-политички препукување, од кои некој може да има малку корист од внимание, можеби дури и од власт, но народот на Северна Македонија останува загрозен, како и државата, економскиот развој, а безбедноста останува исто така ризично поле.
Северна Македонија е органски поврзана со САД и Западот и оваа вистина мора да ја кажуваме секојдневно и гласно. Згора на тоа, оваа вистина мора да ја има на политичкото мени секој ден. Силно верувам дека изјавите на опозицијата против уставните измени, а со тоа и против интеграцијата на државата во Европската унија се црна дамка на еден брилијантен процес кои го посакуваме сите, а тоа е членство на државата во ЕУ. Цврсто верувам дека нема ништо поштетно и во исто време пострашно за Северна Македонија од изјавата: „Не прифаќаме диктат! (читај францускиот предлог)“, предлог на пријателска земја на Северна Македонија и важен фактор за функционирањето на ЕУ. Се плашам дека можеме многу скапо да ги платиме ваквите отфрлања.
Зеф Плуми, свештеник со вреден придонес меѓу Албанците, рекол – секоја авантура со Западот можеме да ја платиме со ново ропство.
Имаме искуство со такви авантури, кои нè оттргнаа од цивилизациските потоци и нè оставија најзаостанати на континентот. Отфрлањето на Западот – свесно или не – кај нас отвора врати и прозорци за очајот, стравот и антизападната идеологија.
