Македонскиот театарски фестивал „Војдан Чернодрински“ на својата веб страница ја објави Архивата на фестивалот, каде што може да се видат сите податоци од почетокот до последната година од фестивалот.
„За да знаеме каде сакаме да стигнеме, треба да знаеме како се изнедрил фестивалот, како се хранел со години, како се качувал или паѓал. Затоа ги чуваме и ги споделуваме спомените и фактите за 57. години на фестивалот. Горди сме на фестивалската архива“, истакнуваат организаторите на фестивалот.
Податоците од архивата на фестивалот се прикажани хронолошки, каде може да се најдат сите евидентирани податоци за фестивалот во соодветната година. Податоците за одиграните претстави и доделените награди се прикажани и во форма на табела, со можност за пребарување и статистика.
Дел од податоците во архивата се преземени од монографијата „ПРОЕКТ ЧЕРНОДРИНСКИ“ издадена по повод јубилејот од 50 години Македонски театарски фестивал „Војдан Чернодрински“.
Во периодот од 04.06.1965 до 16.06.2023 фестивалот се одржал 57 пати. Фестивалот не се одржал во 1974 и во 2020 година.
Ј. Ѓ.
