„Во наредниот период ќе ја објавиме целата процедура за секој оној кој сака да се кандидира за претседател на државата. Ќе треба да подготви и презентира програма на сите тела и органи на партијата. На крајот ќе се носи одлука да се избере најдобриот победнички кандидат,“ рече заменик претседателката на СДСМ и директорката на Управата за јавни работи, Сања Лукаревска во емисијата 24, Анализа на ТВ 24.
Таа посочи дека после 17 години имаме редовни парламентарни избори, кои што се заложба и на претседателот Ковачевски и целото раководство на СДСМ.
„Не сме попуштиле под било какво влијание, напротив, бевме иницијатори на лидерска средба на која сите политички партии си го кажаа својот став,“ рече Лукаревска.
Таа рече дека техничката влада останува. Таа е влада која од технички аспект ќе го спроведува целиот изборен процес.
„Штом ВМРО-ДПМНЕ вели дека не сака техничка влада, тоа е комплимент за нас, бидејќи сфаќаат дека имаме спроведување на демократските процеси,наспроти она на кое што бевме навикнати. Пржинската влада е синоним на тоа време, на едно недомкратско, несоодветно владеење од страна на тогашната власт,“ рече Лукаревска.
Таа истакна дека СДСМ ќе го предводи европскиот фронт и повикани се сите, како граѓански организации, политички партии, граѓаните, да се приклучат. Тоа значи дека СДСМ ќе го води патот кон европската агенда. Да се направи дистинкција кој е за државата да оди напред, кој е за развој на економијата , а кој е за тапкање во место или враќање назад.
