Косовскиот министер за инфраструктура Либурн Алиу денеска соопшти дека Косово отвори воздушен коридор со Албанија, што, како што рече, ќе придонесе летовите до западните земји да се скратат за речиси 15 минути.
„Од 1 јануари патниците ќе заштедат уште повеќе време, покрај тоа што ќе патуваат без виза“, рече Алиу.
Од 1999 година, летовите до и од меѓународниот аеродром во Приштина се вршат само преку воздушниот коридор што го поврзува Косово со Северна Македонија.
Договорот со Албанија за користење на воздушниот коридор на земјата беше постигнат во 2020 година, но имплементацијата на договорот не дојде веднаш поради некои технички прашања што требаше да ги реши Албанија и потребата од согласност на КФОР, јави Бета.
