За периодот пред членството во НАТО, Украина треба да добие безбедносни гаранции, кои не можат да го заменат или сменат членството на Украина во НАТО кое нема алтернативи, изјави претседателот на Украина, Володимир Зеленски во интервју за медиумите во Рига, Латвија, соопштија од кабинетот на претседателот.
Советот Украина-НАТО функционира, тоа е многу добар инструмент кој почна да работи по самитот во Вилнус. Го користевме овој инструмент и видов колку брзо можат да се организираат партнерите, можат да се организираат средби на ниво на министри за одбрана, на ниво на министри за надворешни работи итн, вели Зеленски.
Претседателот, исто така, нагласи дека е започната работа на безбедносните обврски во согласност со Заедничката декларација на Групата седум и Украина усвоена во Вилнус.
„Почнавме да работиме на безбедносните обврски. Не е лесно, но мислам дека во блиска иднина ќе можеме да и го покажеме на јавноста – не само на украинската јавност – првиот нацрт. Не сето тоа, бидејќи таму се класифицирани, нејавни норми, но ќе можеме да споделиме некои генерички точки. Мислам дека оценката ќе биде позитивна“, рече шефот на државата.
Тој истакна дека безбедносните обврски не вклучуваат само обезбедување на оружје, туку и финансиска, ИТ и сајбер поддршка и се чекор на патот на Украина кон безбедносен сојуз.
„Сепак, ние би сакале да видиме вистински чекор од земјите на НАТО што ќе ја доближи Украина до Алијансата. За да се избегне стагнација. Сакаме ова да биде успешен и моќен самит (Самитот на НАТО во Вашингтон – Ед.), така што земјите на НАТО покажуваат дека не се плашат од Русија“, додаде Володимир Зеленски.
Драган Мишев / Цивил Медиа
