Новак Ѓоковиќ се мачеше на стартот на Австралија Опен против хрватскиот тенисер Дино Прижмиќ, се мачеше и во второто коло против домашниот тенисер Алексеј Попирин, но повторно победи – 6:3, 4:6, 7:6 (7:4 ), 6:3, пренесува српски Спорт Клуб.
Не изгледаше така на стартот од мечот. Во првиот сет најдобриот тенисер на светот беше доста убедлив, тој дел од играта го реши во своја полза со половина гас. Новак имаше две брејк шанси во четвртиот гем, една во шестиот, но не ги искористи.
Потоа стигна до три врзани брејк топки во осмиот гем, првите две не успеа да ги искористи, за третата да ја добие. А потоа лесно го приведе сетот до крај на свој сервис – 6:3.
Сепак, од стартот на вториот сет како да имаше друг ривал од другата страна на мрежата. Попирин, која беше далеку поагресивен, ризикуваше повеќе, сервираше подобро, навремено истрча до мрежата.
Ѓоковиќ не успеа да најде ритам, а Попирин заедно со одличната игра полека ја добиваше и потребната самодоверба за да биде рамноправен во борбата со најдобрите во светот. Брзо направи брејк во третиот гем од вториот сет, а потоа лесно ја одработи работата на својот сервис за големи 4:1.
Водеше со 5:2, но во деветтиот гем Новак направи брејк и потоа сервираше за останување во сетот – 5:4. А потоа направи нешто што обично не го прави, не ја искористи таа можност да израмни, Попирин имаше малку среќа со еден поен, кога топката го погоди врвот од мрежата и слета во половината од теренот на Новак – 6:4.
Во еден момент од третиот сет се чинеше дека нема спас за Ѓоковиќ, Попирин најчесто лесно ги добиваше гемовите на свој сервис, а притоа често го мачеше Новак кога тој сервираше.
Особено во десеттиот гем, кога на сервис на Новак имаше водство од 5:4 и 40:0. Ѓоковиќ спаси три врзани брејка, како и сет поен, а недолго потоа и четврти, за пресврт и останување во сетот.
Тај-брејкот беше решавачки, во кој Ѓоковиќ ја задржа концентрацијата, сервираше подобро, имаше одличен одзив на секој добар потег на Попирин, а третиот сет го доби во одлична завршница – 7:6 (7:4).
Шансите на австралискиот тенисер беа прилично мали во четвртиот сет. Ѓоковиќ повторно го подигна нивото на игра, и го доби одлучувачкиот сет со 6:3.
Подготви: Ј. Ѓ.
