Денеска видовме дека внатре во македонското Собрание имавме пратеници кои не гласаа, а присуствуваа во салата, тоа е еден политички феномен. Слушаме дека немаме потреба од таа техничка влада токму од оние кои беа причина за да се направи таа техничка Влада по еден пржински терк. Kрајно несоодветно e ова однесување на ДПМНЕ, да имате свои министри во техничка Влада а да не ги гласате, изјави заменик претседателката на СДСМ, Сања Лукаревска во Отворено студио на ТВ 21.
Џафери беше член на владата на ДПМНЕ во 2013 година како министер за одбрана. Треба да потсетуваме како беше претходно а како е сега и што се случувало претходно заради вакви небулозни изјави како денешните, додаде Лукаревска.
Таа додаде дека не смее ниту еден политичар да си дозволи да ги дели граѓаните по верска, национална или етничка основа.
Меѓу основните постулати на СДСМ во 2020 година го имавме едно општество за сите, не само за националноста туку и за родови прашања, за младински прашања и нивно позиционирање, за сите теми кои значат почитување на различностите во секој сегменти. Тој постулат ќе го задржиме и во новата победничка програма, истакна Лукаревска.
Таа изрази задоволство што повеќе политички партии ги обединува европската идеја, тоа е европскиот фронт, чиј основоположник е СДСМ. Исто така, нагласи дека се прават последните анализи и согледувања дали ќе одат со заеднички листи, но, според неа, каква и да биде одлуката европскиот фронт ќе биде победник на изборите.
Знам дека европскиот фронт ќе ја извојува победата. Очекувам европскиот фронт да има голем број на пратеници. СДСМ на чело на тој европски фронт ќе овозможи да бидеме дел од ЕУ до 2030 година. Нема поубава и поцврста симболика од 8-ми мај во пресерет на Денот на Европа, 9-ти мај, изјави Лукаревска.
Заменик претседателката на СДСМ потенцира дека „има една партија која сака да не врати назад во едно режимско време од кое едвај спасивме жива глава“.
За каква трансформација зборува ДПМНЕ? Да имаме повторно режим, 27 април, тепање во Собрание, носење на Буџет со влечење и бркање на пратеници, да имаме пак пиштење вриштење? Сега слушаме дека кубење на коси ќе биде новиот напреден систем. Тоа не носи иднина за нашата земја и тој концепт на ДПМНЕ ќе биде поразен на парламентарните избори, истакна Лукаревска.
